ԵՐԵՎԱՆ, 13 ապրիլի — Sputnik. ՀՀ ՊՆ–ն հերքում է մամուլում հրապարակված տեղեկությունը, թե զինվորներն իրենց գումարով են զինվորական մեքենաները նորոգում։
ՀՀ ՊՆ մամուլի ծառայությունն անդրադարձել է այսօր լրատվամիջոցներից մեկում հրապարակած նյութին, որում ապրիլի 12–ին Սյունիքի մարզում տեղի ունեցած վթարից տուժած զինծառայողի մայրն ասում է, որ հաճախ զինվորներն են իրենց գումարով զինվորական մեքենաները նորոգում։
«ՀՀ ՊՆ հաշվեկշռում առկա և զինված ուժերի կարիքների համար շահագործվող բոլոր տեսակի մեքենաների տեխնիկական սպասարկման, վերանորոգման և բոլոր այլ ծախսերը բացառապես հոգում է պաշտպանության նախարարությունը և նախարարության՝ այդ նպատակով հատկացրած միջոցները լիովին բավարար են»,– ասված է հայտարարությունում։
Նշվում է, որ, այդուհանդերձ, պաշտպանության նախարարության համապատասխան ստորաբաժանումները հրապարակման մեջ տեղ գտած հայտարարությունների առնչությամբ կանցկացնեն ծառայողական քննություն, ինչպես նաև կկատարեն անհրաժեշտ ուսումնասիրություններ:
Հիշեցնենք` զինծառայողներին տեղափոխող «Ուրալ» մակնիշի ավտոմեքենան ապրիլի 12-ին՝ ժամը 15:25-ի սահմաններում, դուրս է եկել ճանապարհի երթևեկելի հատվածից և ընկել ձորակը, ինչի հետևանքով 4 զինծառայող է մահացել, 20–ը վնասվածքներ են ստացել։ Մեկի վիճակը ծայրահեղ ծանր է, մյուսներն ունեն ծանր, միջին ու թեթև աստիճանի վնասվածքներ։վ