ԵՐԵՎԱՆ, 13 ապրիլի — Sputnik. Պղնձի համաշխարհային գները 2020 թ-ի հունիսից ի վեր հասել են ամենաբարձր մակարդակին և ուրբաթ՝ ապրիլի 12-ին, կազմել են 9 590 դոլար 1 տոննայի համար։ Տարեսկզբից Լոնդոնի բորսայում պղնձի գնանշումներն աճել են ավելի քան 11 տոկոսով։
Ինչպես նշում է Mining.com ոլորտային պարբերականը, ներդրողներն ընդհանուր առմամբ կարծում են, որ պղնձի արդյունահանումը (կրճատվել է անցած տարվա վերջին) չի հասնի աճող պահանջարկին։
Անցած տարվա վերջին Պանամայի իշխանությունները, բնապահպանական նկատառումներից ելնելով, որոշել են փակել աշխարհում խոշորագույն պղնձի հանքերից մեկը՝ Cobre Panama-ն, որի արդյունահանման հզորությունը (մաքուր պղնձի հաշվարկի առումով) տարեկան մոտ 400 հազար տոննա է: Բացի այդ, աշխարհի խոշորագույն հանքարդյունաբերական ընկերություններից մեկը՝ Anglo American Plc-ը, հայտարարել է տարեկան մոտ 200 հազար տոննայով արդյունահանման կրճատման մասին։
Պահանջարկի առումով Չինաստանի արդյունահանությունը ցույց է տալիս վերականգնման նշաններ։ ՉԺՀ-ի արդյունաբերական արտադրության ամսական ինդեքսը մարտին աճել է վերջին կես տարվա մեջ առաջին անգամ։ Արդյունքում այս տարվա առաջին եռամսյակում Չինաստանում մաքուր պղնձի ներկրումն աճել է գրեթե 7 տոկոսով (2023 թ-ի նույն շրջանի համեմատ)։
Թեև պետք է հաշվի առնել նաև, որ Չինաստանում մաքուր պղնձի պահեստներում ձևավորվել են բավականաչափ պահուստներ։ Այդ մասին վկայում է այն, որ պղնձի սպոտային գները (անհապաղ գնման համար) ավելի ցածր են, քան ֆյուչերսայինը, ինչը վկայում է շուկայում զգալի պաշարների մասին։
Համաշխարհային շուկաներում թանկանում են նաև ոսկին և նավթը։ Brent և WTI ապրանքանիշի նավթի գնանշումներն անցած հոկտեմբերից ամենաբարձր մակարդակում են թե՛ համաշխարհային տնտեսության վերականգնման հեռանկարների, թե՛ Մերձավոր Արևելքում տեղի ունեցող իրադարձությունների պատճառով։
Ոսկու գները հասել են պատմական առավելագույնին, այդ թվում՝ ԱՄՆ Դաշնային պահեստային համակարգի դիրքորոշման անորոշության պատճառով, և որպես հետևանք դոլարի փոխարժեքի։ Այդ պատճառով ավելի շատ ներդրողներ ընտրում են ոսկին՝ որպես պակաս եկամտաբեր, բայց հուսալի ակտիվ։
Նշենք, որ պղնձի խտանյութը (մաքուր պղնձի կիսաֆաբրիկատ) շարունակում է մնալ Հայաստանից ամենաշատ արտահանվող արտադրանքներից մեկը. 2023 թ-ի առաջին կիսամյակում (վերջին հասանելի տվյալները) դրա արտահանումը կազմել է մոտ 230 մլն դոլար։