Իրանի ԻՀՊԿ-ն իսրայելցի գործարարի ընկերությանը պատկանող պորտուգալական լցանավ է ձերբակալել

ԵՐԵՎԱՆ, 13 ապրիլի — Sputnik. Իրանը Հորմուզի նեղուցում գրավել է Պորտուգալիայի դրոշի ներքո գտնվող MSC Aries լցանավը, հաղորդում է RT-ն:

Associated Press գործակալության տվյալներով՝ լցանավը կապված է լոնդոնյան Zodiac Maritime ընկերության հետ, որը իսրայելցի գործարար Էյալ Օֆերի Zodiac Group-ի մաս է կազմում:

Նավը տեղափոխվել է Իրանի տարածքային ջրեր այն բանից հետո, երբ դրա վրա հատուկջոկատայիններ են իջել:

Միացյալ Թագավորության ծովային առևտրային գործառնությունների վարչությունը (UKMTO) հաստատել է կոնտեյներային նավի առգրավման փաստը:

Գրավումը տեղի է ունեցել Իսրայելին Իրանի կողմից սպասվող հարվածի ֆոնին, ինչը պատասխան կլինի Իրանի Իսլամական հեղափոխության պահապանների կորպուսի (ԻՀՊԿ) ստորաբաժանման հրամանատար գեներալ Մոհամմադ Ռեզա Զահեդիի չեզոքացմանը սիրիական Դամասկոսում Իրանի հյուպատոսությանը հարվածելու ժամանակ:

Իսրայելի ԱԳՆ-ն արդեն ԵՄ-ին կոչ է արել ԻՀՊԿ-ն ճանաչել ահաբեկչական կազմակերպություն և պատժամիջոցներ սահմանել Իրանի դեմ: Իսրայելի նախարար Իսրայել Կացը Իրանին մեղադրել է Հորմուզի նեղուցում նավի գրավումից հետո «ծովահենային գործողություն» իրականացնելու և «միջազգային իրավունքը խախտելու» մեջ: