ԵՐԵՎԱՆ,12 ապրիլի – Sputnik. Մինսկում ԱՊՀ երկրների նախարարների խորհրդի նիստը սկսվել է մեկ րոպե լռությամբ՝ ի հիշատակ «Կրոկուս Սիթի Հոլում» ահաբեկչության զոհերի։ Տեղեկությունը հայտնում է ՌԻԱ Նովոստին:
«Մեր այսօրվա նիստը տեղի է ունենում տիեզերագնացության օրը, երբ մենք կարող ենք հպարտությամբ հիշել տիեզերական տարածության յուրացման ընդհանուր ձեռքբերումները և միասին ուրախանալ նոր հաջողություններով․.. Սակայն այդ ուրախությունը մթագնում է այն թարմ ցավը, որն առաջացել է Մերձմոսկվայում 145 մարդու կյանք խլած ահաբեկչության բազմաթիվ զոհերի պատճառով», - ասել է Բելառուսի արտգործնախարար Սերգեյ Ալեյնիկը նեղ ձևաչափով նիստի ժամանակ։
Նա ընդգծել է, որ բացի ռուսներից՝ այս սարսափելի հանցագործության զոհերի և տուժածների թվում կան ԱՊՀ այլ երկրների քաղաքացիներ:
«Ահաբեկչությունից և դրա միջազգային բաղադրիչից տուժում են անմեղ մարդիկ՝ անկախ ազգությունից, էթնիկ կամ կրոնական պատկանելությունից։ Մենք կիսում ենք զոհվածների հարազատների ու մտերիմների, ողջ ռուս ժողովրդի վիշտը։ Առաջարկում եմ մեկ րոպե լռությամբ հարգել «Կրոկուս Սիթի Հոլում» ահաբեկչության զոհերի հիշատակը», - ավելացրել է Բելառուսի ԱԳՆ ղեկավարը։
Նախատեսվում է, որ նիստի ընթացքում ԱԳՆ ղեկավարները կարծիքներ կփոխանակեն միջազգային և տարածաշրջանային հրատապ թեմաների շուրջ, կքննարկեն ԱՊՀ շրջանակում փոխգործակցությանը վերաբերող հարցեր: Հանդիպման ընթացքում զգալի ուշադրություն կդարձվի ԱՊՀ մասնակից պետությունների արտաքին քաղաքական համակարգման ամրապնդման թեմային:
Նիստում, ինչպես ավելի վաղ ասել էր Համագործակցության գլխավոր քարտուղար Սերգեյ Լեբեդևը, նախատեսվում է ընդունել նախարարների հայտարարությունները «Կրոկուս Սիթի Հոլում» տեղի ունեցած ահաբեկչության, ինչպես նաև ՄԱԿ-ի Գլխավոր ասամբլեայում ԱՊՀ-ին դիտորդի կարգավիճակ տալու 30-ամյակի կապակցությամբ: Ընդհանուր առմամբ, նիստի օրակարգում ընդգրկված է 10 հարց: