«Մենք պետք է այստեղ գործունեություն ծավալենք` անկախ նրանից դա դուր է գալիս ինչ–որ մեկին, թե ոչ»,– Sputnik Արմենիայի եթերում ասել է Արցախի Ազգային ժողովի «Արդարություն» խմբակցության պատգամավոր, «Արդարություն ու վերադարձ» հասարակական կազմակերպության համահիմնադիր Մետաքսե Հակոբյանը` արձագանքելով վարչապետ Նիկոլ Փաշինյանի վերջին հայտարարություններին։
Ապրիլի 10-ին ԱԺ–ում կառավարության 2023թ–ի գործունեության ծրագրի կատարողականը ներկայացնելիս վարչապետ Նիկոլ Փաշինյանն անդրադարձել էր բռնի հայաթափված Արցախի` Հայաստան տեղափոխված ղեկավարության հարցին։
Փաշինյանը մասնավորապես ասել է, որ եղել է հնարավորություն եվրոպական հարթակներում խոսակցություն սկսել Ադրբեջանի հետ, սակայն Լեռնային Ղարաբաղը չի գնացել, որովհետև արգելել են։
«Տվյալներ ունենք, կարծում եմ նաև ապացույցներ, որ Լեռնային Ղարաբաղի մի խումբ ներկայացուցիչներ ասում էին՝ լավ, էստեղ չի լինի, կգնանք՝ Հայաստանում իշխանությունը կվերցնենք»,- ԱԺ-ի ամբիոնից հայտարարել էր Փաշինյանը։
Հայաստանի վարչապետը նաև ասել էր, որ Լեռնային Ղարաբաղից բռնի տեղահանված որոշ շրջանակներ կամա թե ակամա անում է գործողություններ և քայլեր, որոնք սպառնալիք են ստեղծում ՀՀ համար և շեշտել էր. «Հայաստանում կա մեկ կառավարություն և մեկ Ազգային ժողով»: