ԵՐԵՎԱՆ,11 ապրիլի – Sputnik. ՀՀ վարչապետ Նիկոլ Փաշինյանը այսօր ԱԺ–ում՝ 2023 թ. կառավարության կատարողականի ներկայացումը եզրափակող ելույթի ժամանակ անդրադարձավ ԵԱՀԿ Մինսկի խմբի համանախագահների գործունեությանը ու անվանեց այն «աշխարաքաղաքական լեգիտիմ մրցակցություն Հայաստանի Հանրապետության վրա»։
«Էտքան մեզ ասում են, որ մենք Հայաստանը դարձում ենք աշխարհաքաղաքական թատերաբեմ, կներե՛ք, ամոթ էլ է ասել, լսող չկա, չէ՞, մեզ (ծիծաղում է – խմբ.), բայց ԵԱՀԿ Մինսկի խումբն էդ ի՞նչ էր, եթե ոչ աշխարաքաղաքական լեգիտիմ մրցակցություն ՀՀ-ի վրա։ Էդ ի՞նչ էր»,– ասաց նա։
Վարչապետը հիշեցրեց, որ ԵԱՀԿ Մինսկի խմբի համանախագահները հերիք չէ՝ միմյանց հետ կոնֆլիկտ ունեին, դեռ ավելին` 2022 թ–ից միմյանց դեմ պատերազմում են։
«Այսինքն` դուք մտածում էիք, որ Ֆրանսիայի, ԱՄՆ–ի ու Ռուսաստանի շահերը այնպես են համընկնում, որ հեսա գալու են ու էս սե՞նց են անելու, էն` էնե՞նց են անելու։ Մեզ 30 տարի «մեշոկի» նման շպրտել են էս կողմից էն կողմ, էն կողմից էս կողմ, էտ չե՞ք նկատել»,– հայտարարեց Նիկոլ Փաշինյանը։
Վարչապետը իր ելույթում նաև նշեց, որ ԵԱՀԿ Մինսկի խմբի անդամները Հայաստանին այլ բան էին ասում, բայց այլ բաներ էին անում։
«Մենք ուզում ենք ասենք` հլը մի րոպե, ընկերներ, էստեղ երկիր կա, էստեղ կառավարություն կա, ժողովուրդ կա, տեսլական կա»,– եզրափակեց նա։
Հիշեցնենք` ԵԱՀԿ Մինսկի խումբը ձևավորվել է Ղարաբաղյան հակամարտությունը լուծելու համար։ Խմբի ձևավորման մասին որոշումն ընդունել է ԵԱՀԿ անդամ պետությունների նախարարների խորհուրդը 1992 թվականի մարտի 24-ին։ Մինսկի խմբում ընդգրկված են Բելառուսը, Գերմանիան, Իտալիան, Շվեդիան, Ֆինլանդիան և Թուրքիան, Հայաստանն ու Ադրբեջանը։ 1997 թ. ստեղծվեց ԵԱՀԿ Մինսկի խմբի եռանախագահությունը (Ռուսաստան, Ֆրանսիա, ԱՄՆ)։
Վերջին տարիներին դրա գործունեությունը դե ֆակտո սառեցված է, դե յուրե՝ ոչ։