ԵՐԵՎԱՆ, 10 ապրիլի – Sputnik. Հայաստանի Հանրապետությունը կարգո տերմինալի ավելի մեծ ռեսուրս ունի, քան այս պահին օգտագործվում է։ Այսօր Ազգային ժողովում կառավարության հետ հարցուպատասխանի ժամանակ այս հայտարարությունն արեց ՀՀ փոխվարչապետ Մհեր Գրիգորյանը՝ պատասխանելով «Քաղաքացիական պայմանագիր» խմբակցության պատգամավոր Արմեն Խաչատրյանի հարցին, թե ինչ քայլեր են ձեռնարկվում կարգո ավիացիոն ռեսուրսներն ավելացնելու ուղղությամբ։
«Դա բավականին բարդ բիզնես է, քանի որ կարգո փոխադրումների պարագայում ինքնաթիռը պետք է ժամ ավելի գետնի վրա չմնա, հակառակ դեպքում փոխադրման ինքնարժեքը շատ թանկ է ստացվում ։ Սակայն մեզ դա պետք է ամեն դեպքում, և հայեցակարգային մակարդակով է դեռևս հարցը քննարկվում»,- ասաց Գրիգորյանը։
Փոխվարչապետի խոսքով՝ կոնկրետ մոդելավորված ձև չկա, թե ինչպես կարելի է կարգո ավիացիոն ռեսուրսները զարգացնել։ Սակայն պետությունը պատրաստ է ամեն կերպ նպաստել գործընթացին, եթե կարող է որևէ կերպ օգնել, խթանել մասնավոր հատվածին կարգո փոխադրումները կազմակերպել, ապա կանի դա։