ԵՐԵՎԱՆ, 10 ապրիլի – Sputnik. Եթե Տավուշի մարզի 4 գյուղը հանձնի, Ադրբեջանը կարող է գազամուղը փակել և «խեղդել» Հայաստանը։ Այս մասին Ազգային ժողովի մոտ ընթացող հանրահավաքի ժամանակ ասաց ՀՀ նախկին վարչապետ, «Միասին» շարժման անդամ Հրանտ Բագրատյանը՝ անդրադառնալով ԱԺ-ում կառավարության կատարողականը քննարկելիս ՀՀ վարչապետ Նիկոլ Փաշինյանի արած հայտարարություններին։
«Միասին» շարժումն արդեն 2-րդ օրն է` Ազգային ժողովի շենքի դիմաց հանրահավաք է անցկացնում ու պահանջում է ՀՀ վարչապետ Նիկոլ Փաշինյանի հրաժարականը։ Նրանք ԱԺ-ի մոտ են, քանի որ ապրիլի 9-ին Հայաստանի և Ադրբեջանի միջև սահմանազատման և սահմանագծման հարցով հրատապ նիստն էր ընթանում, իսկ այսօր արդեն քննարկվում էր կառավարության կատարողականը։
Նիկոլ Փաշինյանը ԱԺ-ում կառավարության կատարողականի քննարկման ժամանակ ասաց, որ Հայաստանը դեմ չէ Ադրբեջանի հետ սահմանազատման գործընթացը Տավուշի մարզի և Ադրբեջանի Ղազախի շրջանի 4 գյուղի հատվածից սկսելուն։ Միևնույն ժամանակ շեշտեց՝ այդ հատվածում սահմանազատումն ու դրա արդյունքների իրագործումն անվտանգություն չեն երաշխավորում։
«Ինքն այսօր Հայաստանի պաշտպանության, Ադրբեջանի հետ խաղաղության հարցերը չի լուծում։ Նա այսօր լուծում է ռուսներին Հայաստանից վտարելու հարցը։ Դա Արևմուտքի պատվերն է։ Խաղաղության հարց առհասարակ չկա, Ադրբեջանը որքան ուզում է, այնքան էլ կվերցնի։ Նոյեմբերյանի շրջանից է ամեն ինչ սկսվում, որովհետև այդ ճանապարհով Ադրբեջանը դուրս է գալիս գազամուղի ու երկաթգծի վրա, կկարողանա փակել։ Թուրքիային էլ ասում է՝ ատոմակայանը փակի, լույս չենք ունենա, գազ չենք ունենա, պատերազմի դեպքում էլ 15 օրում մեզ կխեղդեն։ Ո՞նց Լեռնային Ղարաբաղը խեղդեցին՝ գազամուղը փակելով»,- ասաց Բագրատյանը։
Հիշեցնենք, նաև, որ Փաշինյանն այսօր նաև ընդգծել էր, թե Տավուշի հատվածում սահմանազատման իրականացումը չի երաշխավորում նաև այն, որ Ադրբեջանը կպահի սահմանազատումը շարունակելու տրամաբանությունը և կվերադարձնի մեր մոտ 3 տասնյակ գյուղերի կենսական տարածքները։