ԵՐԵՎԱՆ, 9 ապրիլի – Sputnik. «Միասին» շարժումը ՀՀ Ազգային ժողովի շենքի դիմաց հանրահավաք է անցկացնում ու պատրաստ է կտրուկ քայլերի գնալ՝ շրջափակել կառավարության շենքը, եթե քաղաքացիների մեծ մասը դուրս գա փողոց և միանա իրենց։
Նշենք, որ այսօր ԱԺ-ում Հայաստանի և Ադրբեջանի միջև սահմանազատման և սահմանագծման հարցով հրատապ նիստն է տեղի ունեցել։ Ե՛վ ընդդիմադիր, և՛ իշխանական որոշ պատգամավորների թույլ չտվեցին մասնակցել նիստին, քանի որ նրանք գաղտնիության թույլտվություն չունեն՝ «Հայաստան» խմբակցությունից Արմեն Գևորգյանն է, Ասպրամ Կրպեյանը, Արման Ղազարյանը, Մհեր Մելքոնյանը, Լևոն Քոչարյանը, Արմեն Ռուստամյանը, Մհեր Սահակյանը, Արթուր Սարգսյանը, Սեյրան Օհանյանը, իսկ ՔՊ-ից՝ Դավիթ Կարապետյանը։
«Միասին» շարժման անդամ, ՀՀ նախկին վարչապետ Հրանտ Բագրատյանը շեշտեց՝ 6-8 ամիս ժամանակ կա նոր իշխանություն ստեղծելու համար։
«Դուք պետք է լինեք 50 000, 100 000, շատ պետք է լինեք։ Մենք այդ ժամանակ գործողություններ կանենք, կշրջափակենք կառավարությունը, Գլխավոր շտաբը, Ազգային ժողովը։ Կգնանք կպահանջենք, որ հեռուստատեսությունն ուղիղ եթե տա։ Մեզ մարդաքանակ է պետք»,- նշեց Բագրատյանը։
Արցախցի գրող Աննա Այվազյանն էլ նշեց, որ ԱԺ պատգամավորները պետք է քառօրյայի ավարտից հետո քննարկեն իրենց պահանջը ու անվստահություն հայտնեն ՀՀ վարչապետին։
Նա շեշտեց՝ խոսքն ուղղված է և՛ ընդդիմադիր, և՛ իշխանական պատգամավորներին։
Ավելի վաղ հայտնել էինք, որ «Միասին» շարժումը պահանջագիր-հայտարարություն էր տարածել, որով կոչ էր անում ԱԺ բոլոր խմբակցություններին Փաշինյանին անվստահություն հայտնելու ԱԺ որոշման նախագիծ ներկայացնել։ Շարժումը ԱԺ խմբակցություններից ակնկալում է հայտնել իրենց որոշման մասին մինչև ապրիլի 10-ը։
Շարժման համակարգող, Դեմոկրատական կուսակցության ղեկավար Արամ Սարգսյանն ընդգծեց, որ վաղը պետք է այս իշխանությունը հեռացնել։
«Մենք ասում ենք, որ այն կառավարությունը, որը խախտել է արդեն ընդունված ծրագիրը, ապա իրավունք չունի շարունակել լինել կառավարություն։ Պետք է կառավարության կատարողականի դեմ քվեարկել ու հեռացնել նրան իշխանությունից։ Բոլոր խմբակցությունները պետք է դեմ քվեարկեն, որպեսզի լիազորություններն ավարտվեն։ Վաղը որոշիչ օր է, սկսելու են այդ կատարողականի քննարկումը, մենք էլ ժամը 16։00-ից պետք է այստեղ լինենք, պետք է ճնշում գործադրել»,- ասաց Սարգսյանը։
Նա շեշտեց՝ եթե բոլորը դեմ չքվեարկեն, ապա իրենք կդիմեն իրավապահներին։
Հիշեցնենք, որ պահանջագրում ասվում է, որ Փաշինյանին անվստահություն հայտնելու հիմքը նրա կողմից 2021 թվականի օգոստոսի 18-ին ՀՀ ԱԺ կողմից ընդունված «Ծրագիր Հայաստանի Հանրապետության կառավարության (2021-2026 թթ.)» օրենքի ուժ ունեցող փաստաթղթի հիմնական բովանդակության բացարձակ խախտումն է։
«Միասին» շարժումը պատրաստ է ներկայացնել ՀՀ վարչապետի թեկնածու։