ԵՐԵՎԱՆ, 9 ապրիլի – Sputnik. ԱՊՀ արտգործնախարարների խորհրդի նիստին ՀՀ արտաքին գործերի նախարար Արարատ Միրզոյանի չմասնակցելը հերթական արկածախնդրությունն է։ Այս մասին լրագրողների հետ ճեպազրույցում հայտնեց ԱԺ «Հայաստան» խմբակցության պատգամավոր Արմեն Ռուստամյանը։
«Մենք ասել ենք, որ հազար հարցով կարելի է դժգոհել ՀԱՊԿ–ից, մեր ռազմավարական գործընկերոջ պահվածքից, բայց կատարել քայլեր, որը նշանակում է վեկտորի փոփոխություն և Ռուսաստան–Արևմուտք պատերազմի տեղափոխում Հայաստան, կործանարար հետևանք կարող է ունենալ Հայաստանի համար։ Սա այն է, ինչ այսօր ՀՀ իշխանությունն անում է»,–ասաց Ռուստամյանը։
Նա ընդգծեց, որ ՀՀ իշխանությունը որքան էլ հայտարարի, որ սա դիվերսիֆիկացում է, դա իրականությանը չի համապատասխանում, հակառակ դեպքում ինչն է խանգարում գնալ ԱՊՀ նիստերին և բարձրացնել ՀՀ–ին հուզող հարցերը։
«Այն կողմից (նկատի ունի Արևմուտք–խմբ.) պահանջ է դրված, որ Հայաստանը պետք է պարզապես միանա հակառուսական ճակատին։ Այդ խնդիրն այսօր բարեհաջող իրականացնում է ՀՀ իշխանությունը»,–ասաց նա։