ԵՐԵՎԱՆ, 9 ապրիլի – Sputnik. Անբարեխիղճ գործարարները շահութաբաժիններ ստանալիս չեն կարողանա օգտվել հարկային արտոնություններից։ «ՀՀ հարկային օրենսգրքում» համապատասխան փոփոխությունների նախագիծը Ազգային ժողովում այսօր ներկայացրեց ՀՀ ֆինանսների փոխնախարար Արման Պողոսյանը:
2017 թ. օտարերկրյա քաղաքացիները, իսկ 2018 թվականից նաև ՀՀ քաղաքացիները, սկսել են շահութաբաժիններից հարկվել եկամտահարկով: Միևնույն ժամանակ նրանց համար սկսեց գործել այդ շահաբաժիններից եկամտահարկի վերադարձի համակարգը, եթե նրանք շահաբաժինները վերաներդրեն բիզնեսում։
Ընդհանուր առմամբ, 2018–23 թթ. շահութաբաժիններից հավաքագրվել է 66–67 մլրդ դրամ եկամտահարկ, որի 55 տոկոսը վերադարձվել է։ Այս արտոնությունը հասցեական դարձնելու համար ՀՀ ֆինանսների նախարարությունը ցանկանում է, որ դրանից օգտվեն միայն բարեխիղճ գործարարները։
Այդ պատճառով առաջարկվում է վերացնել արտոնություններն այնպիսի խախտումների դեպքում, երբ չկա հսկողություն կամ վերահսկողություն, և ակնհայտ է հարկերից կանխամտածված խուսափում։
Փոխնախարարի խոսքով` դրանց թվին է պատկանում, օրինակ, աշխատողի ընդունելությունն առանց ձևակերպման կամ առանց փաստաթղթերի գործարքների կատարումը։
«4,5–5 հազար գործարարներից, որոնք ստանում են այդ արտոնությունները, շատերը ձեռնարկություններում թույլ են տալիս նման խախտումներ։ Հիմա, եթե մենք գործարարների համար արտոնությունները կապենք նրանց ձեռնարկություններում հարկային կարգապահության հետ, ապա կարծում եմ, որ նրանց վարքագիծը կփոխվի»,– հայտարարել Է փոխնախարարը։
ԱԺ տնտեսական հարցերի մշտական հանձնաժողովի փոխնախագահ Բաբկեն Թունյանը նշեց, որ մինչև 2–րդ ընթերցում կհստակեցվի հարկային արտոնությունները բացառող խախտումների ցանկը:
Նշենք, որ շահութաբաժիններից եկամտահարկը չպետք է շփոթել եկամուտից ստացված հարկի հետ: Վերջինս վճարվում է ընկերության շահույթից, իսկ առաջինը՝ նրա հիմնադիրների ստացած շահաբաժիններից։