ԵՐԵՎԱՆ, 8 ապրիլի – Sputnik. ԵԱՏՄ տարածքում վաճառվող մսի և մսամթերքի համար կսահմանվեն սպիտակուցների և ճարպերի պարունակության պահանջներ։ Sputnik Արմենիա մամուլի կենտրոնի ուղիղ միացմամբ կայացած հեռուստակամրջի ժամանակ այս մասին ասաց Եվրասիական տնտեսական հանձնաժողովի տեխնիկական կարգավորման նախարար Վալենտին Տատարիցկին՝ մեկնաբանելով ապրիլի 7–ից ուժի մեջ մտած «մսի և մսամթերքի անվտանգության մասին» տեխնիկական կանոնակարգի փոփոխությունները։
Նոր պահանջների համաձայն՝ մթերքում սպիտակուցի իրական պարունակությունը պետք է կազմի փաթեթավորման վրա նշվածի առնվազն 80%–ը, իսկ ճարպինը՝ ոչ ավելի, քան 120 %–ը։
Այս շեղումների պատճառն այն է, որ բնական արտադրանքի դեպքում անհնար է բացարձակ միատարրության հասնել սպիտակուցների, ճարպերի և այլ նյութերի պարունակության մեջ։
ԵՏՀ նախարարը հստակեցրեց, որ նոր պահանջները չեն տարածվի մինչև ապրիլի 7–ը վաճառքի հանված ապրանքների վրա, սակայն հետագայում ապրանքները պետք է համապատասխանեն նոր պահանջներին: