ԵՐԵՎԱՆ, 4 ապրիլի – Sputnik. Երևանում անցկացվող Սամբոյի աշխարհի գավաթի խաղարկությունում 3 հայ սամբիստներ` Արթուր Մանուկյանը (64 կգ), Կառլեն Մահինյանը (71 կգ) և Դավիթ Հովսեփյանը (58 կգ) դարձել են արծաթե մեդալակիրներ։
Արցախից բռնի տեղահանված Դավիթ Հովսեփյանը հանդես է գալիս փախստականների դրոշի ներքո։
64 կգ քաշային Արթուր Մանուկյանը եզրափակիչում մրցել է FIAS-ի դրոշի ներքո հանդես եկող ռուսաստանաբնակ Վլադիմիր Մնացակյանի հետ ու պարտվել 0:9 հաշվով: Իսկ 71 կգ քաշային Կառլեն Մահինյանը եզրափակիչում զիջել է FIAS-ի դրոշի ներքո հանդես եկող ռուս Իվան Ագաֆոնովին:
Արցախցի Դավիթ Հովսեփյանը 58 կգ քաշայինների եզրափակիչում պարտվել է FIAS-ի դրոշի ներքո հանդես եկող ռուսաստանցի, աշխարհի գավաթակիր Խարուն Տլիշևին:
Իսկ Կարեն Սարգսյանը (58 կգ), Իռենա Պետրոսյանը (54 կգ ), Արփինե Մնացականյանը (54 կգ), Սրբուհի Հովակիմյանը (59 կգ), Արթուր Հակոբյանը (79 կգ), Գրիգոր Բեկնազարյանը (98 կգ) բրոնզե մեդալների են արժանացել։
Նշենք, որ Սամբոյի աշխարհի գավաթի խաղարկությունը մեկնարկել է այսօր ու կավարտվի վաղը։ Խաղարկությանը մասնակցում են 13 թիմերի ավելի քան 200 մարզիկներ:
Ավելի վաղ հայտնել էինք, որ սամբոյի միջազգային ֆեդերացիան որոշմամբ այսուհետ ամեն տարի Սամբոյի աշխարհի առաջնությունը կանցկացվի Հայաստանում։