ԵՐԵՎԱՆ, 3 ապրիլի — Sputnik. ՎՏԲ խմբի բանկերը Հայաստանում, Բելառուսում և Ղազախստանում շարունակում են ամբողջությամբ սպասարկել «Միր» քարտերը։ ՌԻԱ Նովոստիին այս մասին հայտնել են բանկի մամուլի ծառայությունից։
«ՎՏԲ խմբի բանկերը Հայաստանում, Բելառուսում և Ղազախստանում շարունակում են իրենց ենթակառուցվածքում ամբողջ ծավալով սպասարկել «Միր» քարտերը, ինչպես եղել է նախկինում։ ՎՏԲ խմբի բանկերի և ցանկացած այլ ռուսական բանկերի «Միր» քարտատերերը կարող են գումար կանխիկացնել բանկոմատներից, վճարումներ ու փոխանցումներ (այդ թվում` միջազգային) կատարել բջջային հավելվածներով»,- ասվում է հաղորդագրությունում։
Կախված երկրից՝ փոխանցումները կարելի է իրականացնել հեռախոսի կամ քարտի համարով, բանկային ռեկվիզիտներով, ինչպես նաև կանխիկի տրամադրումով։
«Մենք հետևում ենք այդ երկրների ֆինանսական շուկայում տիրող իրավիճակին և հաշվի ենք առնում նրանց տարածքներում մեր բանկոմատների և տերմինալների ցանցի ծանրաբեռնվածությունը, անհրաժեշտության դեպքում ՎՏԲ-ն միշտ պատրաստ է օպերատիվ կերպով արձագանքել շուկայի իրադրության փոփոխությանը», - նշել են մամուլի ծառայությունից։
Հիշեցնենք` ArCa ազգային վճարային համակարգը հայտարարել է, որ մարտի 30-ից դադարելու է սպասարկել «Միր» քարտերը։ Այդ քարտերի սպասարկումը կշարունակի «ՎՏԲ Հայաստան» բանկը, որի չի մտնում ArCa համակարգի մեջ։
Հայաստանի բանկերի միությունից Sputnik Արմենիային հայտնել են, որ հայկական բանկերը որոշել են դադարեցնել «Միր» պլաստիկ քարտերի սպասարկումը՝ հաշվի առնելով պատժամիջոցների հետ կապված ռիսկերը։