Հիասթափված է նաև հենց իշխանական ընտրազանգվածը․ քաղտեխնոլոգը՝ Փաշինյանի վարկանիշի մասին

ԵՐԵՎԱՆ, 3 ապրիլի – Sputnik. ՀՀ վարչապետ Նիկոլ Փաշինյանի վարկանիշի, այսպես ասած, պատմական մինիմումի պատճառն այն է, որ կա հսկայական հիասթափություն հենց իշխանական ընտրազանգվածի մոտ։ Sputnik Արմենիայի հետ զրույցում ասաց քաղտեխնոլոգ Վիգեն Հակոբյանը։

Նշենք, որ Gallup-ի վերջին հարցումների համաձայն՝ հարցվածների միայն 8 տոկոսն է Փաշինյանի աշխատանքը դրական համարում։

Քաղտեխնոլոգի խոսքով՝ վարկանիշի անկումը դեռևս անցյալ տարվանից կա։ Առհասարակ, տարբեր ժամանակահատվածներում անցկացված հարցումները ցույց էին տալիս, որ վարչապետի վարկանիշը սրընթաց իջնում է, տենդենցը պահպանվել է, և, բնականաբար, վերջին արդյունքները պետք է արձանագրեին պատմական մինիմումը։

Նա հիշեցնում է, որ այն պայմանագիրը, որի նախագիծը գոյություն ունի, կոչվում է ոչ թե խաղաղության, այլ՝ Ադրբեջանի և Հայաստանի միջև փոպհարաբերությունների հաստատման մասին պայմանագիր։

Փաստորեն, ըստ մեր զրուցակցի, այն մարդիկ, որոնք Փաշինյանին ձայն էին տալիս՝ որպես խաղաղություն բերող մարդու, հասկացան, որ այդ նախագիծը, խոստումն էլ տապալված է։ Այսօր ամեն ինչ գնում է վատ սցենարներով՝ կորուստները շարունակվում են, պատերազմի վտանգը պահպանվում է։ Ներկա վարկանիշը հենց այդ իրողության փաստումն է։

Վարկանիշի անկումն, այնուամենայնիվ, շոշափելի փոփոխություն կամ դրական տեղաշարժ չի կարող բերել, եթե հանրային տրամադրությունների նկատելի տրանսֆորմացիայից ճիշտ ձևով չօգտվեն Փաշինյանի քաղաքական ընդդիմախոսները։ Քաղտեխնոլոգը կարծում է, թե եթե հիմա հայտնվի այնպիսի առաջնորդ, որը կձևավորի ռեալ այլընտրանք, այդ թվում՝ խոստացված ու տապալված խաղաղության համար, հասարակությունը կարող է գնալ նրա հետևից։ Իսկ խաղաղության ռեալ կոնցեպտի առաջարկ պետք է, որովհետև, ըստ Հակոբյանի, հասարակության մեջ խաղաղության պահանջ իսկապես կա։