ԵՐԵՎԱՆ, 3 ապրիլի – Sputnik. Երևանում բացահայտվել է օտարերկրացիների կողմից խմբի կազմում թմրամիջոցների ապօրինի շրջանառությամբ զբաղվելու դեպք, Ուկրաինայի երկու քաղաքացիներ են կալանավորվել։ Տեղեկությունը հայտնում է ՀՀ քննչական կոմիտեի մամուլի ծառայությունը։
Ըստ հաղորդագրության՝ մարտի 29-ին Արին Բերդի փողոցի մոտակայքում պարեկները նկատել են երկու անձանց, որոնցից մեկը, տեսնելով իրավապահներին, ձեռքից ինչ-որ իր է նետել և ավտոմեքենայով հեռացել: Ավտոմեքենան կանգնեցրել են և այդ անձանց հետ տեղափոխել ոստիկանության Էրեբունու բաժին: Պարզվել է, որ նրանք Ուկրաինայի քաղաքացիներ են:
Դեպքի վայրի զննությամբ հայտնաբերվել է կապույտ գույնի կպչուն ժապավենով փաթեթավորված, թմրամիջոցի նմանվող զանգվածով 8 փաթեթ: Դատաքիմիական փորձաքննությամբ հաստատվել է, որ փաթեթներից երկուսում մեթադոն տեսակի թմրամիջոց է:
Օտարերկրացիների ավտոմեքենան խուզարկելու արդյունքում հայտնաբերվել են ևս 10 հատ դեղին, 10 հատ կապույտ գույնի կպչուն ժապավենով փաթաթված և 10 հատ ստվարաթղթե փաթեթներ: Նշանակվել է փորձաքննություն։
Նախաքննության ընթացքում պարզվել է, որ Ուկրաինայի երկու քաղաքացիները թմրամիջոցի յուրաքանչյուր փաթեթի տարածման դիմաց գումար ստանալու վերաբերյալ պայմանավորվածություն են ձեռք բերել։ Ապա քննությամբ դեռևս չպարզված անձից ձեռք են բերել թմրամիջոցների 38 փաթեթ, որոնք տեղափոխել են Արին Բերդ փողոց, որտեղ էլ նրանց նկատել են պարեկները։ Նրանք թմրամիջոցները ձեռք են բերել իրացման նպատակով։
Երկու անձանց մեղադրանք է ներկայացվել ՀՀ քրեական օրենսգրքի 393-րդ հոդվածի (թմրամիջոցների ապօրինի իրացումը) 2-րդ մասի 1-ին և 2-րդ կետերով:
Դատարանը նրանց նկատմամբ խափանման միջոց է ընտրել կալանավորումը։
Նախաքննությունը շարունակվում է: Ձեռնարկվում են միջոցառումներ թմրամիջոցների ապօրինի շրջանառության շղթայում ներգրավված հնարավոր այլ անձանց ինքնությունը պարզելու ուղղությամբ: