ԵՐԵՎԱՆ, 1 ապրիլի – Sputnik. ՀՀ–ի պետական շահը պահանջում է, որ Հայաստանն ապրիլի 5–ին մասնակցի ԱՄՆ–ԵՄ–ՀՀ հանդիպմանը։ Լրագրողների հետ զրույցում այս հայտարարությունն արեց ԱԺ «Քաղաքացիական պայմանագիր» խմբակցության անդամ Վաղարշակ Հակոբյանը։
«Մեզ փորձում են սադրել և հանել բանակցային այն գործընթացից, որի մեջ գտնվում ենք։ Բայց պետք է սթափ լինենք, չտրվենք էմոցիայի և շարժվենք ՀՀ պետական շահին համահունչ։ ՀՀ–ին և մեր իշխանությանը ընձեռված է հնարավորություն Եվրամիության և արևմտյան մեր գործընկերների հետ հարաբերությունների խորացման իմաստով, և այդ հնարավորությունը մենք պետք է օգտագործենք ի նպաստ ՀՀ–ի»,– ասաց Հակոբյանը։
Նա ընդգծեց, որ արդյունքների մասին հնարավոր կլինի խոսել հանդիպումից հետո։
Հակոբյանի խոսքով` երբ Հայաստանը մեկ այլ երկրի հետ խորացնում է իր հարաբերությունները, դա ուղղված չէ մեկ այլ երկրի դեմ, առավել ևս` դաշնակից ՌԴ–ի։
«Արևմտյան մեր գործընկերների հետ հարաբերությունների խորացումը միմիայն անում ենք տնտեսության զարգացման, անվտանգության բարձրացման մեր երկրի քաղաքացիների սոցիալական իրավիճակի բարելավման համար։ Այս տրամաբանության մեջ են մեր քայլերը»,–ասաց պատգամավորը։
Հիշեցնենք` Հայաստանի անվտանգության խորհրդի քարտուղար Արմեն Գրիգորյանն ավելի վաղ հայտնել էր, որ Բրյուսելում ապրիլի 5-ին տեղի կունենա Հայաստանի վարչապետ Նիկոլ Փաշինյանի, Եվրոպական հանձնաժողովի նախագահ Ուրսուլա Ֆոն դեր Լյայենի և ԱՄՆ պետքարտուղար Էնթոնի Բլինկենի հանդիպումը։ Ըստ նրա` նախատեսվում է քննարկել եռակողմ համագործակցության ուղիները, որոնք նպաստելու են Հայաստանի զարգացմանը: Միջոցառումը նաև նպատակ ունի ամրապնդել Հայաստանի դիմակայունությունը։