ԵՐԵՎԱՆ, 1 ապրիլի – Sputnik. Վարչական շրջանների մեծամասնությունում երկրորդական փողոցների փոսալցման մրցույթները չեն կայացել: Երևանի քաղաքապետ Տիգրան Ավինյանը սա պարզեց այսօր գործակարգավարական նիստի ժամանակ։
Նա հորդորեց փոսալցման ստանդարտներին վերանայմանը անդրադառնալ մյուս տարվա աշխատանքներից առաջ, որպեսզի այս տարի աշխատանքները չկանգնեն։
«Ինչ փոփոխություններ արվում են, պետք է արվեն ընթացիկ տարվա պրոցեսները չխանգարելու տրամաբանությամբ»,– ասաց Տիգրան Ավինյանը։
Երևանի փոխքաղաքապետ Լևոն Հովհաննիսյանն խոսեց առաջնային փողոցների փոսալցման աշխատանքների մասին ու տեղեկացրեց, որ դրանք մեկնարկել են նախորդ շաբաթվա չորեքշաբթի օրվանից։
«Ընթացքը գնահատում ենք բավարար, ակտիվ կերպով ընթանում է, մասնավորապես` Կենտրոն, Արաբկիր և Նոր Նորք վարչական շրջաններում։ Ակտիվ երթևեկության պատճառով աշխատանքները հիմնականում գիշերային ժամերի են լինում»,– ասաց նա։
Փոսալցման աշխատանքները չեն մեկնարկել միայն Աջափնյակ ու Դավթաշեն վարչական շրջաններում։ Նա տեղեկացրեց, որ դրանք, ըստ պայմանավորվածության, կմեկնարկեն այսօր։
Հիշեցնենք՝ Երևանում փոսային նորոգման աշխատանքները մեկնարկել են մարտի 27-ից։