ԵՐԵՎԱՆ, 1 ապրիլի – Sputnik. 2023 թվականի ընթացքում զինծառայողների՝ ծառայության հետ կապված 54 մահվան դեպք է արձանագրվել։ Տեղեկությունը հայտնում է ՀՀ գլխավոր դատախազության մամուլի ծառայությունը։ 2022 թվականի համեմատ դեպքերն ավելացել են 22-ով կամ 69 տոկոսով․ 2022 թվականի ընթացքում գրանցվել էր զինծառայողների մահվան 32 դեպք։
Նախորդ տարի արձանագրված 54 դեպքերի մեծ մասը՝ 19-ը, եղել են հակառակորդի կողմից սպանություն (2022 թվականին՝ 14), 17-ի դեպքում մահվան պատճառ է դարձել վտանգ ներկայացնող ռազմամթերքի և այլ նյութերի հետ վարվելու կանոնների խախտումը։ 7 դեպքեր վերաբերում են ինքնասպանությանը, ընդ որում՝ 5-ի պարագայում՝ անզգուշությամբ ինքնասպանության հասցնել, 2-ի դեպքում՝ ինքնասպանության հասցնել։ 3 զինծառայող սպանության զոհ են դարձել, 2-ը՝ ավտովթարի, 1-ական զինծառայող մահացել են կայծակնահարության և հոսանքահարման հետևանքով, 4 զինծառայողի մահվան պատճառ է դարձել հիվանդությունը։
Գլխավոր դատախազությունից պարզաբանում են, որ նախորդ տարի մահվան դեպքերի ցուցանիշի աճի համար էական գործոն է դարձել Գեղարքունիքի Ազատ գյուղում տեղի ունեցած հրդեհը, որի հետևանքով 15 զինծառայող է մահացել։
2023 թվականի ընթացքում ծանրության տարբեր աստիճանի մարմնական վնասվածք է ստացել 645 զինծառայող։ Այս դեպքում ցուցանիշի նվազում է 314 դեպքում կամ 33%-ով․ 2022 թվականի ընթացքում 959 դեպք էր արձանագրվել։