ԵՐԵՎԱՆ, 31 մարտի – Sputnik. ԵՄ դիտորդական առաքելությունը հայ– ադրբեջանական սահմանին ոչ մի արտառոց բան այսօր չի նկատել։ Այս մասին գրված է X-ի նրանց միկրոբլոգում։
«Ամբողջ օրը հետևել ենք Հայաստանի րր Ադրբեջանի սահմանին, ամեն ինչ հանգիստ է, ոչ մի արտառոց բան չի հայտնաբերվել»,– գրել են նրանք:
ԵՄ դիտորդական առաքելությունը խաղաղ Հարության տոն է մաղթել բոլորին։
Հարավային Կովկասում ԵՄ հատուկ ներկայացուցիչ Տոյվո Կլաարն էլ X-ի իր միկրոբլոգում, հրապարակելով դիտորդական առաքելության գրառումը, նշել է, որ ուրախ է, որ ԵՄ դիտորդներից հաստատում է եկել, որ սահմանին ամեն ինչ հանգիստ է։ Նա նշել է, որ դիտորդական առաքելության նպատակը հենց սա է։
Նշենք, որ այսօր ՀՀ ՊՆ–ն հերքել էր Ադրբեջանի պաշտպանության նախարարության տարածած հաղորդագրությունը, թե իբր ՀՀ ԶՈւ–ն սահմանագոտու տարբեր ուղղություններում անձնակազմի, զրահատեխնիկայի, հրետանային և կրակային այլ միջոցների կուտակումներ, ակտիվ տեղաշարժեր են իրականացնում։
Հիշեցնենք` Եվրոպայի խորհրդի որոշմամբ` մշտական հիմունքներով ԵՄ դիտորդական առաքելությունը Հայաստանում պաշտոնապես տեղակայվել է 2023 թվականի փետրվարի 20-ից: Մինչ այդ՝ 2022 թվականի հոկտեմբերից, առաքելությունը Հայաստանում էր ժամանակավոր հիմունքներով։ Ներկայում Հայաստան-Ադրբեջան սահմանին առաքելություն իրականացնող եվրադիտորդների թիվը 209 է (նախկին 138-ի փոխարեն):