ԵՐԵՎԱՆ, 30 մարտի – Sputnik. Հայաստանն ու Հնդկաստանը կարող են նոր համագործակցություն սկսել Մատենադարանի ձեռագրերի և արխիվային վավերագրերի վերականգնման ու թվայնացման ոլորտներում։ Տեղեկությունը հայտնում է Մատենադարանի մամուլի ծառայությունը։
Նշվում է, որ Մեսրոպ Մաշտոցի անվան հին ձեռագրերի գիտահետազոտական ինստիտուտ է այցելել Հնդկաստանի ազգային արխիվների տնօրեն Սանջայ Գարգը:
Մատենադարանի տնօրենի տեղակալ Վահե Թորոսյանի ուղեկցությամբ նա այցելել է արխիվի և թվայնացման բաժիններ:
«Հնդկաստանի արխիվների տնօրենի հետ Մատենադարանի ղեկավարությունը քննարկել է հետագա համագործակցության հնարավորությունները, մասնավորաբար՝ ձեռագրերի և արխիվային վավերագրերի ուսումնասիրման, վերականգնման և թվայնացման ոլորտներում»,- տեղեկացնում են Մատենադարանից։
Նշենք, որ Մաշտոցյան Մատենադարանում պահվում են շուրջ 20000 ձեռագրեր՝ հայերեն և այլալեզու։ 1997 թ. Մատենադարանը գրանցվել է ՅՈւՆԵՍԿՕ-ի «Համաշխարհային հիշողության» ցանկում և համարվում է հայոց ազգային հիշողության պահպանման և զարգացման ամենակարևոր վայրերից մեկը: