ԵՐԵՎԱՆ, 29 մարտի — Sputnik. ԵԱՏՄ պետությունները շահագրգռված են Շանհայի համագործակցության կազմակերպության հետ փոխգործակցության ընդլայնմամբ։ Տեղեկությունը ԱՊՀ մասնակից պետությունների միջազգային տնտեսական համաժողովի լիագումար նիստում հայտարարել է Եվրասիական տնտեսական հանձնաժողովի կոլեգիայի նախագահ Բակիտժան Սագինտաևը:
«Ներկայումս ստեղծվել է ԵԱՏՄ-ի և ՇՀԿ-ի փոխգործակցության ինստիտուցիոնալ հիմքը, ստորագրվել է հուշագիր, ավարտվում են հուշագրի իրականացման 2024-2025 թվականների միջոցառումների ծրագրի նախագծի համաձայնեցման աշխատանքները, կարգավորիչների միջև հաստատվել է համակարգային երկխոսություն։ ՇՀԿ անդամ երկրների հետ միջազգային համագործակցությունը կառուցվում է ոչ միայն երկխոսության ձևաչափով, այլև առևտրային համաձայնագրերի տեսքով», - ասել է նա։
Սագինտաևը հիշեցրել է, որ ԵԱՏՄ-ի և Չինաստանի միջև առևտրատնտեսական համագործակցության մասին համաձայնագիր է կնքվել:
Նրա խոսքով՝ ԵԱՏՄ-ն ենթակառուցվածք է կառուցում «Մեծ Եվրասիայի» առանցքային խաղացողների հետ երկխոսության համար։ Եվրասիական մեծ գործընկերության համատեքստում ՇՀԿ-ի, ԱՍԵԱՆ-ի, ԲՐԻԿՍ-ի երկրների, այլ շահագրգիռ պետությունների և միավորումների հետ համակարգային երկխոսության զարգացումը միության միջազգային գործունեության առաջնահերթություններից է: