ԵՐԵՎԱՆ, 28 մարտի – Sputnik. Քննությամբ ապացույցներ են ձեռք բերվել, որ «Կրոկուս Սիթի Հոլ»–ի վրա հարձակում իրականացրած ահաբեկիչները կապ են ունեցել ուկրաինական ազգայնականների հետ։ Տեղեկությունը հայտնում է ՌԴ քննչկան կոմիտեն։
Ըստ հաղորդագրության` հաստատված տվյալներ կան, որ «Կրոկուս Սիթի Հոլ»–ում ահաբեկչության կատարողներին զգալի գումար և կրիպտոարժույթ է փոխանցվել Ուկրաինայից։
«Հետաքննության նախնական արդյունքները լիովին հաստատում են ահաբեկիչների գործողությունների ծրագրված բնույթը, հանգամանորեն նախապատրաստումն ու հանցագործության կազմակերպիչների կողմից ֆինանսական աջակցությունը։ Ձերբակալված ահաբեկիչների հետ աշխատանքի, նրանցից առգրավված տեխնիկական սարքերի ուսումնասիրության, ֆինանսական գործողությունների մասին տեղեկությունների վերլուծության արդյունքում ձեռք են բերվել ուկրաինացի ազգայնականների հետ նրանց կապի ապացույցներ»,-ասված է հաղորդագրության մեջ:
Հայտնաբերվել և ձերբակալվել է ևս մեկ կասկածյալ, որը մասնակցել է ահաբեկիչների ֆինանսավորման սխեմային։ Նրա նկատմամբ կալանքը որպես խափանման միջոց ընտրելու միջնորդություն է ներկայացվելու։
Հիշեցնենք` մարտի 22-ին Մոսկվայի շրջանի «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Տուժածների թիվը հասել է 360–ի (այդ թվում` 11 երեխա), զոհերինը` 143–ի։
Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները` Դալերջոն Միրզոևը, Ռաչաբալիզոդա Սաիդակրամին, Մուհամադսոբիր Ֆայզովը և Ֆարիդունի Շամսիդինը։ Նրանց ցմահ ազատազրկում է սպառնում։ Նրանք, ինչպես նաև ահաբեկչությանն օժանդակելու մեջ մեղադրվող Իսրայել, Դիլովար և Ամինչոն Իսլոմովները կալանավորվել են մինչև մայիսի 22-ը։