ԵՐԵՎԱՆ, 27 մարտի – Sputnik․ Ապրիլի 4-5-ը Երևանում կանցկացվի սամբոյի աշխարհի գավաթի խաղարկությունը, որը կկրի մշտական բնույթ։ Այս մասին լրագրողների հետ զրույցում ասաց Հայաստանի սամբոյի ֆեդերացիայի նախագահ Միքայել Հայրապետյանը։
«Միջազգային սամբոյի ֆեդերացիան որոշում կայացրեց, որ աշխարհի գավաթի խաղարկությունը պետք է անցկացվի Հայաստանում։ Յուրաքանչյուր տարի` նույն ժամանակահատվածում աշխարհի գավաթի խաղարկություն անցկացնելու իրավունքը տրվել է ՀՀ Սամբոյի ֆեդերացիային։ Մենք կարողացանք ցույց տալ աշխարհին, որ Հայաստանում կարող ենք բարձր մակարդոկով միջոցառումներ անցկացնել»,–ասաց նա։
Նշենք, որ երկու տարի անընդմեջ՝ 2022–2023 թթ. Հայաստանը հյուրընկալել է սամբոյի աշխարհի առաջնությունները։
Հայրապետյանը հույս ունի, որ այս տարի միջազգային հարթակներից հայ սամբիստները մեդալներ կբերեն։
«Մեր թիմն աշխարհի գավաթին պատրաստ է։ Յուրաքանչյուր քաշային կարգից ունենալու ենք 2 մարզիկ։ Արցախից բռնի տեղահանված մարզիկները ևս հնարավորություն են ստացել մասնակցելու, քանի որ ունեն փախստականի կարգավիճակ։ Վստահ եմ, որ մեր մարզիկները կկարողանան ոսկիներ նվաճել և բարձրացնել մեր երկրի համբավը»,–ասաց Հայրապետյանը։
Նա հավելեց, որ ապրիլի 2–ից սկսած Միջազգային սամբոյի ֆեդերացիայի պատասխանատուները, կազմակերպչական թիմը լինելու են Հայաստանում։
Մարզական խոշոր միջոցառումն անցկացվելու է «Գազպրոմ արենայում»։
Այս պահի դրությամբ աշխարհի գավաթի խաղարկությանը մասնակցելու հայտ է ներկայացրել 17 երկիր։ Մոտ 300 մարզիկներ կպայքարեն 26 քաշային կարգերում։