ԵՐԵՎԱՆ, 25 մարտի – Sputnik. Հետխորհրդային տարածքում ինտեգրումը հաջողությամբ զարգանում է, քանի որ առաջացող խնդիրները հաջողվում է կառուցողական կերպով հաղթահարել։ Այս մասին aif.ru–ին տված հարցազրույցում ասել է ՌԴ նախագահի մամուլի խոսնակ Դմիտրի Պեսկովը։
Պեսկովը նշել է ընդհանուր ինտեգրացիոն գործընթացներին ԱՊՀ երկրների հավատարմությունը` չնայած զարգացման սեփական հետագծին և ԵԱՏՄ անդամ պետությունների հետ ընդհանուր տնտեսական տարածքին։
«Համագործակցության տարբեր ֆորմատներ կան, որոնք կապված են քաղաքականության, անվտանգության հետ։ Բոլոր այդ ինտեգրացիաները աշխատունակ են, դրանց ներուժը դեռ ամբողջությամբ բացահայտված չէ։ Ինչ–որ տեղ, իհարկե, խնդիրներ են առաջանում, առանց դրանց հնարավոր չէ»,– ասել է նա։
Պեսկովի խոսքով` գործընկերային հարաբերությունները թույլ են տալիս այդ ամենին ավելի կառուցողական մոտենալ։
Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը: