ԵՐԵՎԱՆ, 26 մարտի – Sputnik. Վաղվանից մեկնարկում են Երևան քաղաքում փոսային նորոգման աշխատանքները։ Այս մասին ֆեյսբուքյան էջում գրել է Երևանի քաղաքապետի մամուլի խոսնակ Հայկ Կոստանյանը։
«Հրատապությունից ելնելով՝ աշխատանքներն իրականացվելու են նաև գիշերային ժամերին, ուստի ճանապարհային երթևեկության, ինչպես նաև աշխատանքներն իրականացնող անձանց անվտանգության ապահովման նպատակով խնդրում ենք վարորդներին պահպանել ճանապարհային երթևեկության կանոները և լինել առավել զգոն»,–գրել է նա։
Կոստանյանը նաև հավելել է, որ փոսային նորոգման աշխատանքները կատարվելու են հետևյալ պարբերականությամբ՝ 1 օր երթևեկելի մասի վնասված ծածկի կտրում, 1 օր ասֆալտբետոնե նոր ծածկի տեղադրում:
Նշենք, որ վերջին հորդառատ անձրևներից հետո Երևանի փողոցներում առկա փոսերի թիվն աճել է, որն էլ առաջացրել էր վարորդների դժգոհությունը։