ԵՐԵՎԱՆ, 26 մարտի - Sputnik. Բասկետբոլի Եվրոպայի Մ20 տարեկանների Բ դիվիզիոնի առաջնությունը 2025 թվականին կանցկացվի Երևանում: Նման որոշում է կայացվել Բասկետբոլի միջազգային ֆեդերացիայի (ՖԻԲԱ) Եվրոպայի գործկոմի նիստում։ Տեղեկությունը հայտնում է ԿԳՄՍՆ մամուլի ծառայությունը։
Նշվում է, որ երկարատև քննարկումներից հետո ընտրվել է Հայաստանի թեկնածությունը: Մ20 տարեկանների Բ դիվիզիոնի 2025 թվականի առաջնության շրջանակում Հայաստանի մայրաքաղաք կժամանեն եվրոպական 24 երկրների հավաքականներ:
ՀԲՖ գլխավոր քարտուղար Արթուր Նազարյանի խոսքով՝ մրցաշարը լինելու է մինչև օրս Հայաստանի տարածքում անցկացված ամենամեծ միջազգային իրադարձությունը թիմային մարզաձևերի շրջանում:
Առաջնությունը կանցկացվի Երևանի երեք մարզադահլիճներում 2025 թվականի հուլիսին։