ԵՐԵՎԱՆ, 25 մարտի – Sputnik. ՀՀ ԶՈւ գլխավոր շտաբի պետ Էդվարդ Ասրյանը վստահեցնում է` Հայաստանն Ադրբեջանին հող չի հանձնելու։ Այս մասին նա այսօր ասաց ԱԺ–ում` պաշտպանության և անվտանգության հարցերի մշտական հանձնաժողովի նիստից հետո։
«Դուք ինձ արդեն նեղում եք։ Ոչ մեկը հող չի հանձնում, մենք հող տվող չենք, եթե մի բան լավ չեք հասկանում, ավելորդ հարցեր մի տվեք»,– ասաց նա։
Հարցին, թե ինչո՞ւ ՀՀ վարչապետ Նիկոլ Փաշինյանը Տավուշում ասաց, որ եթե զիջումների չգնանաք, 1 շաբաթ հետո պատերազմ կսկսվի` Ասրյանը պատասխանեց.
«ԳՇ պետը ԶՈւ–ի ղեկավարն է, ես ղեկավարում եմ ԶՈւ–ն և ԶՈւ–ն իր առջև դրված խնդիրները հենց հիմա էլ կատարում է»։
Այնուամենայնիվ, որքանով է պատերազմի հավանականությունը այս պահին մեծ հարցին ի պատասխան ԶՈւ ԳՇ ղեկավարն ասաց, որ պատերազմ կարող է լինել 1 ժամ հետո, 2 ժամ հետո, 1 տարի հետո, 2 տարի հետո կամ 5 տարի հետո։
ԱԺ–ում պաշտպանության և անվտանգության հարցերի մշտական հանձնաժողովի նիստին էր մասնակցում նաև ՀՀ պաշտպանության փոխնախարար Արման Սարգսյանը։ Նիստից հետո լրագրողները նրանից հետաքրքրվեցին, կա՞ արդյոք վերջնական որոշում Տավուշի գյուղերի հետ կապված։
«Ամեն ինչի մասին խոսվում է բաց ու թափանցիկ, հանրությունը քննարկում է, կարծում եմ` լրատվութան պակաս ոչ մեկը չունի»,– ասաց Սարգսյանը։
Հիշեցնենք` ՀՀ վարչապետ Նիկոլ Փաշինյանը Տավուշի մարզի Ոսկեպար գյուղի բնակիչների հետ հանդիպմանն ասել է, որ հնարավոր է մինչև շաբաթվա վերջ պատերազմ լինի, եթե հայկական կողմը հրաժարվի Ադրբեջանի հետ քննարկել սահմանազատման և սահմանագծման հարցերը։