ԵՐԵՎԱՆ, 25 մարտի – Sputnik. ՀՀ ներքին գործերի նախարար Վահե Ղազարյանի որոշմամբ AntiFake.am կայքի հիմնադիր, «Քաղաքացիական գիտակցություն» հասարակական կազմակերպության հիմնադիր, «Իմնեմնիմի» փոդքաստի համահեղինակ ու վարող Նարեկ Սամսոնյանին ձերբակալելու կադրերից ելնելով ուսումսասիրություն է իրականացվում։ Այս մասին լրագրողների հետ զրույցում ասաց ՆԳՆ մամուլի խոսնակ Նարեկ Սարգսյանը։
Հայտնել ենք, որ մարտի 22–ի առավոտյան ոստիկանության աշխատակիցներն ավտոկայանատեղիում մի քանի հոգով թիկունքից հարձակվել ու անհամաչափ բիրտ ուժի կիրառմամբ գետնին են տապալել Նարեկ Սամսոնյանին, ապա ձերբակալել։
«ՆԳ նախարարը տեսել է այդ կադրերը և նրա որոշմամբ է, որ ուսումնասիրություն է կատարվում, որը կպարզի կա խնդրահարույց դրվագ, թե չկա»,–լրագրողների հետ զրույցում ասաց Սարգսյանը։
Նա ընդգծեց, որ ամեն տարի ՆԳՆ–ն հրապարակում է ներքին անվտանգության և հակակոռուպցիոն վարչության աշխատանքը, թե քանի ծառայողական քննություն է իրականացվել և քանի ծառայողի նկատմամբ է տույժ նշանակվել։
Սարգսյանի խոսքով` բազմաթիվ դեպքերով նյութերն ուղարկվել են նախաքննական մարմին և նախաձեռնվել է քրեական վարույթ։
Հիշեցնենք, որ «Յութուբով» ուղիղ եթերում հեռարձակվող «Իմնեմնիմի» հաղորդման համահեղինակներ և վարողներ Նարեկ Սամսոնյանին ու Վազգեն Սաղաթելյանին մեղադրանք է առաջադրվել` հաղորդակցական տեխնոլոգիաներն օգտագործելով խմբի կազմում խուլիգանություն կատարելու համար։