ԵՐԵՎԱՆ, 25 մարտի – Sputnik․ Կրասնոգորսկի հիվանդանոցի բոլոր բուժաշխատողները, տեղեկանալով «Կրոկուս Սիթի Հոլ»–ումտեղի ունեցած ահաբեկչության մասին, կամավոր վերադարձել են աշխատանքի և օգնություն ցուցաբերել տուժածներին, «Իզվեստիայի» հետ զրույցում պատմել է վիրաբույժ Կարեն Պողոսովը, որ ծանր վիրավորներին օգնելու հարուստ փորձ ունի. նա 1992-2001թթ.ծառայել է Արցախում որպես ռազմական վիրաբույժ:
«Հենց լսեցին, որ նման բան է տեղի ունեցել, մարդիկ շտապեցին հիվանդանոց՝ անգամ առանց հարցնելու՝ պետք է–պետք չէ»,- ասել է վիրաբույժը։
Նրա գնահատմամբ՝ բժիշկների և հիվանդանոցի ողջ բժշկական անձնակազմի աշխատանքը հիացմունք է առաջացնում։ Պողոսովը պատմել է, որ բժիշկները, բուժքույրերը, մայրապետները հիվանդանոց են հասել ոտքով, հեծանիվով։ Իսկ նրանք, ովքեր արդեն ավարտել էին հերթափոխը, տուն չեն գնացել, այլ շարունակել են օգնել հիվանդանոց ընդունվող տուժածներին։
«Դա ինձ քիչ թե շատ ծանոթ էր, քիչ թե շատ հանգիստ էի։ Ավելին` մեջքիս հետևում երիտասարդ վիրաբույժներ էին կանգնած, հարցնում էին՝ կկարողանա՞նք հաղթահարել այս ամենը։ Ստացվեց, արեցին։ Եվ այսօր մաքուր խղճով կարող ենք յուրաքանչյուրի աչքերին նայել և ասել՝ մենք դա արել ենք այնպես, ինչպես պետք էր, և այն ծավալով, որն անհրաժեշտ էր հիվանդներին»,- պատմել է բժիշկը։
Հիշեցնենք` մարտի 22-ին Մոսկվայի շրջանի «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Վերջին տվյալներով` ահաբեկչության հետևանքով տուժել է 285 մարդ (այդ թվում՝ 8 երեխա), որոնցից 133-ը մահացել են (այդ թվում՝ 3 երեխա)։ Բուժհաստատություններ են տեղափոխվել և հոսպիտալացվել 114 մարդ, որից 4-ը՝ երեխա։
Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները` Դալերջոն Միրզոևը, Ռաչաբալիզոդա Սաիդակրամին, Մուհամմադսոբիր Ֆայզովը և Ֆարիդունի Շամսիդինը։ Նրանց ցմահ ազատազրկում է սպառնում։