ԵՐԵՎԱՆ, 24 մարտի - Sputnik. Ռուսաստանի Դաշնությունում ՀՀ դեսպանությունը մշտական կապի մեջ է ՌԴ համապատասխան կառույցների հետ՝ մարտի 22-ին Մոսկվայում տեղի ունեցած ահաբեկչության զոհերի թվում Հայաստանի Հանրապետության քաղաքացիների և հայերի առկայության վերաբերյալ։ Այս մասին հայտնում է ՀՀ ԱԳՆ մամուլի խոսնակ Անի Բադալյանը։
Ավելի վաղ սոցցանցերի հայկական տիրույթում տեղեկատվություն էր տարածվել, որ Իսրայելյան Լիլիթը կորել է ահաբեկչությունից հետո։ Հաղորդվում էր, որ իր ամուսնուն մահացած են գտել Կրոկուսում, իսկ Լիլիթը անհետացել է։ Նրանց 1.5 տարեկան երեխան տատիկի ու պապիկի մոտ է։
«Ոչ պաշտոնական աղբյուրներով տարածված տեղեկատվությունը նույնպես կստուգվի բոլոր հնարավոր շրջանակների ներգրավմամբ։ Պաշտոնական հաստատման դեպքում համապատասխան տեղեկություն կտրամադրվի»,-նշել է նա։
Հիշեցնենք` մարտի 22-ին հայտնի դարձավ, որ մերձմոսկովյան Կրասնոգորսկում գտնվող «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Վերջին տվյալներով` ահաբեկչության հետևանքով տուժել է 285 մարդ (այդ թվում՝ 8 երեխա), որոնցից 133-ը մահացել են (այդ թվում ՝ 3 երեխա)։ Բուժհաստատություններ են տեղափոխվել և հոսպիտալացվել 114 մարդ, որից 4-ը՝ երեխա։
Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները։
Մարտի 24-ը ՌԴ-ում հայտարարվել է համազգային սգո օր։