Ժուռնալիստների միությունը դատապարտում է ոստիկանության ուժի կիրառումը Սամսոնյանի նկատմամբ

ԵՐԵՎԱՆ, 22 մարտի – Sputnik. Հայաստանի ժուռնալիստների միությունը խստորեն դատապարտում է ոստիկանության աշխատակիցների վայրագ գործողությունները AntiFake.am կայքի հիմնադիր, «Քաղաքացիական գիտակցություն» հասարակական կազմակերպության հիմնադիր, «Իմնեմնիմի» փոդքաստի համահեղինակ ու վարող Նարեկ Սամսոնյանի նկատմամբ: Այս մասին հայտարարություն է տարածել Հայաստանի ժուռնալիստների միությունը։

Նշենք, որ այսօր առավոտյան, ոստիկանության աշխատակիցներն ավտոկայանատեղիում մի քանի հոգով թիկունքից հարձակվել ու անհամաչափ բիրտ ուժի կիրառմամբ գետնին են տապալել Նարեկ Սամսոնյանին:

Ընդգծվում է, որ Սամսոնյանին նման կերպ ձերբակալել կարող էին միայն, եթե վերջինս կոշտ դիմադրություն ցույց տար, զինված լիներ կամ ոստիկանների կյանքին վտանգ սպառնար, ինչը, դատելով հրապարակված տեսանյութից, չի եղել:

Հիշեցնենք, որ մարտի 22-ին ոստիկանության դիմակավորված ծառայողները բիրտ ուժ կիրառելով՝ ձերբակալել են Նարեկ Սամսոնյանին։ Այնուհետև, մի քանի ժամ անց, գնացել են նաև Վազգեն Սաղաթելյանի (նա ՀՀԿ–ական նախկին պատգամավոր Արման Սաղաթելյանի եղբայրն է – խմբ.) տան մոտ և դատարանի որոշումը ներկայացնելուց հետո ձեռնաշղթաներ հագցրել ու ձերբակալել։