ԵՐԵՎԱՆ, 22 մարտի – Sputnik. ՀՀ ԱԺ նախագահ Ալեն Սիմոնյանը Ժնևում Ադրբեջանի խորհրդարանի նախագահ Սահիբա Գաֆարովայի հետ քննարկել է երկու երկրների միջև ընթացող խաղաղ բանակցությունների գործընթացին խորհրդարանների հնարավոր աջակցությունը: Տեղեկությունը հայտնում է ՀՀ ԱԺ մամուլի ծառայությունը։
Նշենք, որ Ալեն Սիմոնյանը Սահիբա Գաֆարովայի հետ հանդիպել է Ժնևում անցկացվող Միջխորհրդարանական միության 148-րդ վեհաժողովի շրջանակում։ Հանդիպումը կազմակերպվել է Միջխորհրդարանական միության նախաձեռնությամբ և միջնորդությամբ:
«Կողմերը պայմանավորվել են դիտարկել միջխորհրդարանական մակարդակով երկխոսության հնարավորությունը: Հանդիպումն անցել է կառուցողական մթնոլորտում»,–նշված է հաղորդագրության մեջ։
Հանդիպման ավարտին երկու երկրների խորհրդարանների ղեկավարները հանդես են եկել համատեղ հայտարարությամբ:
Նշենք, որ Ալեն Սիմոնյանը մարտի 19-21-ը Բրյուսելում էր, իսկ մարտի 22-25-ը լինելու է Ժնևում (Շվեյցարիայի Համադաշնություն)` մասնակցելու Միջխորհրդարանական միության 148-րդ վեհաժողովին։