Սուրենյանցի կտավը վերադարձել է. ի՞նչ բացահայտումներ են արել «Սալոմեն» վերականգնելիս

ԵՐԵՎԱՆ, 22 մարտի – Sputnik. Չորս տարի ընդմիջումից հետո Վարդգես Սուրենյանցի «Սալոմեն» կրկին Հայաստանի ազգային պատկերասրահի ցուցասրահում է` արդեն վերականգնված, նոր ու շքեղ տեսքով։ Այսօր Հայաստանի ազգային պատկերասրահում տեղի ունեցավ վերականգնված կտավի առաջին պաշտոնական ցուցադրությունը։

Վարդգես Սուրենյանցի ամենահայտնի, տպավորիչ և ազդեցիկ կտավներից մեկն արդեն 4 տարի համալիր վերականգնման փուլում էր։ 1907 թ. ստեղծված «Սալոմեն» Հռոմից Երևան է տեղափոխվել 1929 թվականին։ Այս տարիների ընթացքում մի քանի անգամ մասնակի վերականգնվել է, բայց ամբողջական վերականգնում առաջին անգամ էր կատարվում։

Վերականգնող մասնագետները Sputnik Արմենիայի հետ զրույցում ասացին, որ բավական դժվար աշխատանք են կատարել, քանի որ կտավը լուրջ վնասվածքներ է ունեցել։

«Տարիների ընթացքում բացի ճաքերից առաջացել էին նաև կետային թափվածքներ։ Այսինքն` ճաքերը այնքան էին շատացել, որ նկարի հեղինակային շերտը սկսել էր շատ թույլ, բայց արդեն թափվել։ Հատկապես ստորին հատվածում էր նման խնդիրներ առաջացել»,– ասում է նկարիչ-վերականգնող Արտաշես Աբրահամյանը։

Վերականգնման ընթացքում մասնագետները պարզել են, որ Սուրենյանցը Սալոմեին նկարելիս օգտագործել է ոչ միայն յուղաներկ, այլ նաև տեմպերա, մատիտ և յուղամատիտ։

«Ելնելով նրանից, որ այդ բոլոր ներկանյութերի առկայությունը կար մեկ կտավում` եղան նաև բարդություններ, դժվարություններ ամրակայման նյութը որոշելու համար»,– պատմում է նկարիչ- վերականգնող Տաթևիկ Ամիրխանյանը։

Կտավի ավելի խորը ուսումնասիրությունը ցույց է տվել, որ այն ունի նաև հորինվածքի խախտումներ։ Այսինքն` շրջանակը, որով երկար ժամանակ ցուցադրվել է Սուրենյանցի «Սալոմեն», գեղանկարից փոքր է եղել ու ծածկել է նկարի որոշ մասը։ Համալիր վերականգնման արդյունքում վերացվել է նաև այդ խնդիրը։