ԵՐԵՎԱՆ, 22 մարտի – Sputnik. Հայաստանը չի մասնակցել մարտի 19-21-ը կայացած մոսկովյան MITT զբոսաշրջային ցուցահանդեսին։ Այս մասին Sputnik Արմենիայի հետ զրույցում ասաց Զբոսաշրջության կոմիտեի մարկետինգի բաժնի ղեկավար Անուշ Սահակյանը։
Արդեն երկրորդ տարին է, ինչ Հայաստանն իր տաղավարը չի ներկայացնում Մոսկվայի զբոսաշրջության և հյուրընկալության ոլորտի խոշորագույն միջազգային ցուցահանդեսում։
«Այս տարի էլ չմասնակցեցինք, քանի որ ավելի նպատակահարմար համարեցինք այլ միջոցառումներ կազմակերպել ռուսական շուկայից զբոսաշրջիկների ներգրավելու համար»,- ասաց նա։
Նրա խոսքով` ցուցահանդեսին չմասնակցելը չի նշանակում, որ կոմիտեն չի աշխատում Ռուսաստանից զբոսաշրջիկներ ներգրավելու ուղղությամբ։ Սահակյանն ասաց, որ համագործակցություն է հաստատվել ռուսական մասնագիտացված ընկերության հետ, որն օգնում է Հայաստանով հետաքրքրվող թիրախային խմբերի ներգրավման հարցում։
«Ռուսաստանը մեծ երկիր է, և հնարավոր չէ մեկ ցուցահանդեսով հանդես գալ և գրավել զբոսաշրջիկներին, ուստի մենք ընտրել ենք մասնագիտացված խմբերի հետ աշխատանքը»,- նշեց նա։
Սահակյանը հավելեց, որ ապրիլի 10–ին և 11–ին Հայաստանի զբոսաշրջության ոլորտի ներկայացուցիչները, այդ թվում տուրօպերատորները, կմեկնեն Սանկտ Պետերբուրգ և Մոսկվա, որտեղ հանդիպումներ կունենան ռուս գործընկերների հետ, շնորհանդեսով նրանց կծանոթացնեն հայկական ապրանքներն ու երկրի հետ փոխգործակցության հնարավորությունները։ Նա ընդգծեց, որ սա արդյունավետ ձևաչափ է և աշխատանքը կշարունակվի նույն հունով։
Նշենք, որ 2024 թվականի հունվար-փետրվարին Հայաստան է այցելել 281 560 զբոսաշրջիկ, որը մոտ 3 %–ով պակաս է 2023 թվականի նույն ամիսների ցուցանիշից (290 000)։ Հայաստան այցելած զբոսաշրջիկների եռյակում է Ռուսաստանը՝ 43% (131 000 մարդ), Վրաստանը` 14% (39 000 մարդ) և Իրանը` 7% (18 000 մարդ)։