ԵՐԵՎԱՆ, 22 մարտի–Sputnik. Հայաստանի երիտասարդական հավաքականը Եվրոպայի առաջնության ընտրական խմբի հերթական խաղում մրցակցի հարկի տակ ոչ-ոքի՝ 0։0 ավարտեց հանդիպումը Չեռնոգորիայի հավաքականի հետ։
2023 թվականի սեպտեմբերի 12-ին Եվրոպայի առաջնության ընտրական խմբի շրջանակում Հայաստանի և Չեռնոգորիայի երիտասարդական հավաքականները մրցեցին Երևանում, ու այդ հավասար խաղի ելքը վճռեց հյուրերի խփած միակ գնդակը։ Հաշվի առնելով այդ հանդիպումը, որի արդարացի ելքը կլիներ ոչ-ոքին, կարելի էր ենթադրել, որ պատասխան խաղում էլ ֆավորիտ չի լինելու, քանի որ իրոք թիմերը հավասար հնարավորություններ ունեին։
Եվ այս ամենի վառ ապացույցը Չեռնոգորիա U21- Հայաստան U21 հավաքականների պատասխան խաղի առաջին կեսն էր, որի ընթացքում մրցող կողմերը գոլային պահ այդպես էլ չստեղծեցին ու ընդմիջման գնացին ինչպես որ սկսել էին խաղը՝ 0։0 հաշվի պայմաններում։
Երկրորդ խաղակեսում մեր հավաքականի ֆուտբոլիստներն ակտիվացան։ Սպառնալիքները դաշտի տերերի դարպասին սկսեցին հաճախակի առաջանալ։ Վստահ կարելի էր ասել, որ այդ առումով մերոնք արդեն առավելություն ունեին։ Սակայն ստեղծելով վտանգավոր պահեր` մեր ֆուտբոլիստները չէին կարողանում գործը հասցնել տրամաբանական ավարտին՝ դարպասի գրավմանը։ Ի վերջո այս խաղում դարպասի գրավում չարձանագրվեց, ու մեր հավաքականը երկրորդ միավորը վաստակեց ընտրական խմբում, բայց եզրափակում է մրցաշարային աղյուսակը։
Հաջորդ հանդիպումը Հայաստանի երիտասարդական հավաքականն անցկացնելու է մարտի 26-ին։ Այդ օրը Արմեն Գյուլբուդաղյանցի թիմը Երևանում հյուրընկալելու է Ռումինիայի իր հասակակիցներին։