ԵՐԵՎԱՆ, 21 մարտի – Sputnik. Հայաստանում էլեկտրոնային դեղատոմսերի համակարգի ներդրումից հետո այս շաբաթ արդեն հարցերի տեղատարափը նվազել է։ Այս մասին կառավարության նիստից հետո լրագրողների հետ զրույցում ասաց ՀՀ առողջապահության նախարար Անահիտ Ավանեսյանը։
«Հարցերի տեղատարափը բավականին նվազել է, և այս շաբաթ նկատում ենք, որ շատ ավելի հանգիստ և առանց խնդիրների է ամեն ինչ գործում։ Մեզ համար շատ կարևոր են ձեր (լրագրողների – խմբ.) ահազանգերը, որպեսզի վեր հանենք առաջացած խնդիրներն ու հրատապ լուծումներ տանք, առաջ գնանք»,– նշեց Անդրեասյանը։
Նրա խոսքով` պետք է ժամանակ տալ, որպեսզի մարդիկ ընտելանան, ու սա շատ նորմալ գործընթաց է։
Հարցին` արդյոք մտավախություն չկա՞, որ կարող է դեղորայքի գինը բարձրանալ, Ավանեսյանը շեշտեց` նման բան չի լինի։ Բացատրեց` նախկինում, որ թուղթը տպելու համար միջինում 8 դրամ էր ծախսվում, այսօր արդեն նման բան չի լինելու, այսինքն` ծախսերի կրճատում է, ոչ թե ավելացում։
Նա անդրադարձավ նաև լրագրողների այն նկատառմանը, արդյոք կարող են անհատները սկսել դեղորայք վաճառել քաղաքացիներին։ Նախարարը վստահեցրեց` նման ռիսկեր չի տեսնում, քանի որ բոլոր երկրներում նույն մեխանիզմն է գործում` դեղորայքը վաճառվում է էլեկտրոնային դեղատոմսով։
Հիշեցնենք` մարտի 1–ից էլեկտրոնային դեղատոմսերով վաճառվում է 470 անուն դեղ, որից 375–ը անվճար և արտոնյալ պայմաններով դեղերն են։ Էլեկտրոնային դեղատոմսերի համակարգում ներառվել է ՀՀ–ում գրանցված դեղերի 20 տոկոսը, իսկ ՀՀ–ում ընդհանուր առմամբ կա գրանցված 3 370 անուն դեղ։
2025 թվականի հունվարի 1–ից արդեն էլեկտրոնային տարբերակով կվաճառվի 2 566 անուն դեղ։ Մնացածը դեղերը ազատ կվաճառվեն, քանի որ ներառված չեն պարտադիր դեղատոմսով դուրս գրվելու ցանկում։