Ազգային ժողովը ձայների 57 կողմ, 27 ձեռնպահ հարաբերակցությամբ երեկ վավերացրեց Հայաստանում տեղակայված Եվրամիության դիտորդական առաքելության համաձայնագիրը։ Փաստաթղթի վավերացմանը ձեռնպահ քվեարկեցին ընդդիմադիր «Հայաստան» և «Պատիվ ունեմ» խմբակցությունները։
2023 թվականի փետրվարին Հայաստան ժամանած դիտորդների քանակը կհամալրվի և սեպտեմբերին նախատեսվում է, որ առաքելության կազմում կլինեն 209 դիտորդներ։ Երեկ վավերացված համաձայնագրով Եվրամիության առաքելության անդամները ստանում են դիվանագիտական կարգավիճակ. նրանց ծառայողական գույքը` ավտոմեքենաները, տեխնիկան ենթակա չեն մաքսային զննման և Հայաստանում գրանցման ստանդարտ ընթացակարգերի:
Դիտորդները կօգտվեն իրավական անձեռնմխելիությունից։ Այն շենքերը, որոնցում տեղակայված է առաքելությունը, խուզարկության ենթակա չեն լինի։ Անձեռնմխելի կլինեն նաև առաքելության նամակագրությունը և արխիվները։ Բացի այդ` Եվրամիությունն իրավունք ունի դիտորդական առաքելությանը մասնակից դարձնել անձանց` Եվրամիությանը չանդամակցող երկրներից։
Նիդեռլանդների Թագավորությունում ՀՀ նախկին դեսպան Ձյունիկ Աղաջանյանը Sputnik Արմենիայի եթերում ներկայացրել է «ԵՄ առաքելության կարգավիճակի մասին» համաձայնագրում թաքնված վտանգներն ու իրական նպատակները։