ԵՐԵՎԱՆ, 19 մարտի – Sputnik. ՀՀ առևտրային բանկերը դադարեցնել են «Միր» վճարային համակարգի հետ համագործակցությունը` հաշվի առնելով պատժամիջոցների հետ կապված ռիսկերը։ Տեղեկությունը հայտնում է Հայաստանի բանկերի միությունը`պատասխանելով Sputnik Արմենիայի գրավոր հարցմանը։
Նշենք, որ Հայաստանում «Միր» քարտերի սպասարկման հնարավոր դադարեցման մասին հաղորդագրություններ են տարածել ռուսական ԶԼՄ–ները` հղում անելով անանուն աղբյուրների։
Հայաստանի բանկերի միությունն ընդգծել է, որ այս տարվա փետրվարին ԱՄՆ Oտարերկրյա ակտիվների վերահսկողության վարչությունը (Office of Foreign Assets Control (OFAC)) պատժամիջոցնե է սահմանել, որով էլ «Միր» վճարային համակարգն ընդգրկվել է պատժամիջոցների ցուցակում։
«Այս հանգամանքով պայմանավորված՝ ՀՀ առևտրային բանկերը, հաշվի առնելով պատժամիջոցների հետ կապված ռիսկերը, ինչպես նաև կարևորելով միջազգային գործառնություններում ներգրավվածության շարունակականությունը, որոշում են կայացրել դադարեցնել «Միր» վճարային համակարգի հետ համագործակցությունը»,– նշված է հաղորդագրության մեջ։
Շեշտվում է, որ ՎՏԲ-Հայաստան բանկը լինելով ռուսական ՎՏԲ-ի դուստր-բանկ՝ շարունակելու է համագործակցությունը «Միր» վճարային համակարգի հետ։
Հավելենք նաև, որ Ազգային վճարային քարտերի համակարգը (НСПК ) Հայաստանի վճարային համակարգից պաշտոնական ծանուցում է ստացել, որ 2024 թվականի մարտի 30-ից ArCa-ի անդամ բանկերը դադարեցնում են սպասարկել «Միր» քարտերը։
Այսօր ավելի վաղ էլ ՀՀ կենտրոնական բանկը նշել է, որ ՀՀ առևտրային բանկերն ինքնուրույն են որոշում, թե որ վճարային համակարգերի հետ համագործակցեն՝ ելնելով իրենց ռիսկերի կառավարման ռազմավարությունից (ներառյալ պատժամիջոցների հետ կապված ռիսկերը):
Ընդգծվել էր, որ սպասարկման պայմաններում փոփոխությունների դեպքում բանկերը պարտավոր են պատշաճ տեղեկացնել իրենց հաճախորդներին։
Հավելենք, որ լրատվամիջոցների տեղեկություններով` «ՎՏԲ Հայաստան»–ում հիմնական գործառնությունները հասանելի կլինեն «Միր» քարտապանների համար: Դրանց թվում են ՎՏԲ-ի բանկոմատներից (Հայաստան) կանխիկացում, առցանց բանկային ծառայությունների վճարումներ և առցանց գնումներ։
Այսօր Հայաստանում գործում է ՎՏԲ-ի 53 մասնաճյուղ, որից 22-ը գտնվում է Երևանում։ Հանրապետությունում հաճախորդներին հասանելի են ավելի քան 190 բանկոմատներ։
Նշենք, որ նմանատիպ տեղեկություն ռուսական մամուլում հայտնվել էր 2021 թվականի սեպտեմբերին։ Այնուհետեւ հայկական բանկերում «Միր» քարտերի սպասարկման դադարեցման մասին տեղեկությունը չհաստատվեց։