ԵՐԵՎԱՆ, 17 մարտի – Sputnik. Միջազգային օլիմպիական կոմիտեի (ՄՕԿ) նախագահ Թոմաս Բախը հայտարարել է, որ վախենում է Փարիզում ամառային օլիմպիական խաղերի անցկացումից առաջ Ռուսաստանի կողմից ագրեսիվ հայտարարություններից: Նրա խոսքերը մեջբերում է ՌԻԱ Նովոստին։
«Ռուսաստանից այնքան շատ հակասական հաղորդագրություններ են ստացվում, որ ես չեմ պատրաստվում մեկնաբանել արտահայտված բոլոր կարծիքները։ Մենք մտավախություն ունենք, որ Ռուսաստանի և ՌԴ կառավարության կողմից ավելի ու ավելի ագրեսիվ հայտարարություններ կհնչեն։ Այնպես որ, տեսնենք, թե ինչ է տեղի ունենում: Մենք պայմաններ ենք դրել։ Այդ պայմանները չեն փոխվի։ Նրանց, ովքեր պատրաստ են պահպանել դրանք, հրավիրում ենք Փարիզ։ Չենք սպասում նրանց, որոնք չեն ցանկանում հետևել կանոններին», - Բախի խոսքը մեջբերում է Inside the Games հարթակը։
Ավելի վաղ Ռուսաստանի օլիմպիական կոմիտեի նախագահ Ստանիսլավ Պոզդնյակովը ասել էր, որ ռուս մարզիկները Օլիմպիադային մասնակցելու համար «պետք է դատապարտեն հատուկ ռազմական գործողությունը, ստորագրեն փաստաթղթեր, որոնք կարող են ռուսական օրենսդրության խախտման հանգեցնել»: ՄՕԿ-ի թույլտվության չափանիշները հատուկ ռազմական գործողության ակտիվ աջակցության արգելք են պարունակում: ՄՕԿ-ի մամուլի ծառայությունից ՌԻԱ Նովոստիին հայտնել են, որ մինչև Փարիզի Օլիմպիադան չեզոք կարգավիճակով ռուսաստանցի մարզիկներին ընդունելու չափանիշները չեն փոխվի, ՄՕԿ-ի գործկոմը հաջորդ շաբաթ կքննարկի դրանց իրականացումը:
ՄՕԿ-ը դեկտեմբերի 8-ին հայտարարել է, որ ռուսաստանցիներին թույլատրվում է մասնակցել Փարիզի խաղերին անհատական չեզոք կարգավիճակով՝ մի շարք չափանիշների պահպանմամբ: Ավելի վաղ ՌԴ նախագահի օգնական Իգոր Լևիտինը հայտարարել էր, որ Վլադիմիր Պուտինը հանձնարարել է սպորտի նախարարությանը և Ռուսաստանի օլիմպիական կոմիտեին 2024 թվականի Օլիմպիադային մարզիկների մասնակցության վերաբերյալ առաջարկներ մշակել: