ԵՐԵՎԱՆ, 17 մարտի – Sputnik. Արտասահմանում ՌԴ նախագահական ընտրությունների քվեարկության մասին կեղծ լուրեր են տարածվում համացանցում։ Ընտրատեղամասերի մոտ գոյացած հերթերի տեսանյութերն ու լուսանկարները տարածվում են որպես բողոքի ակցիայի տեսանյութեր, հայտնում է ՌԴ ԱԳՆ-ն։
«Արտասահմանյան երկրներում քվեարկության մասին կեղծիքները տարածվում են առցանց, այդ թվում՝ Telegram-ի ալիքներով... Տեխնոլոգիան պարզ է և նույնիսկ պարզունակ. բազմաթիվ լուսանկարներ և տեսանյութեր են արվում ռուսաստանցիների հերթերից, ովքեր եկել էին իրենց քաղաքացիական պարտքը կատարելու, իսկ հետո այդ տեսանյութերը ներկայացվում են որպես բողոքի ակցիա»,- ասվում է դիվանագիտական գերատեսչության Telegram ալիքի հաղորդագրության մեջ։
Իր հերթին, ՌԴ ԱԳՆ պաշտոնական ներկայացուցիչ Մարիա Զախարովան Telegram-ի իր ալիքում գրել է, որ արտերկրի ռուսները մերժել են մարգինալացվածների կոչերը և շարվել էին ոչ թե բողոքի ակցիաների համար, այլ քվեարկելու Ռուսաստանի Դաշնության նախագահական ընտրություններում։
«Նրանք հերթ են կանգնել ուրբաթ, շաբաթ օրերին և այսօր: Նրանք չեն հեռացել և չեն հեռանա մինչև ուշ երեկո», - գրել է Զախարովան Telegram-ի իր ալիքում:
Արտաքին գործերի նախարարության խոսնակը նաև նշել է, որ Ռուսաստանի դեսպանատները պաշտոնապես երկարացրել են քվեարկության ժամանակը և «հավելյալ անձնակազմ են ուղարկել, որպեսզի մարդիկ կարողանան հասցնել քվեարկել և արտահայտել իրենց կամքը»։
«Ռուսաստանի քաղաքացիները չեն եկել բողոքի ցույցերի, ոչ թե ներկայացումների, ինչպես փորձում են ներկայացնել անբարյացակամ ռեժիմները և նրանց վճարովի տեղեկատվական ծառայությունները, նրանք եկել են իրենց ձայնը տալու՝ օգտվելով հնարավորությունից, որ չնայած Արևմուտքի բոլոր սպառնալիքներին իրենց երկիրը՝ Ռուսաստանը, նրանց տրամադրել է։ Իսկ, թե ում համար և ինչպես են քվեարկել՝ դա իրենց ազատ ընտրությունն էր։ Բայց այն, որ նրանք մերժեցին մարգինալացվածների կոչերը, ակնհայտ է բոլորի համար»,- ընդգծել է Զախարովան։
Հիշեցնենք, որ Երևանում ՌԴ նախագահի ընտրություններն անցկացվում են երկու տեղամասերում ՝ ՌԴ դեսպանատանը և Էրեբունի ավիաբազայում (զինծառայողների և նրանց ընտանիքների անդամների համար): Գյումրիում տեղամասերը բացվել են 102-րդ ռազմաբազայում և ՌԴ գլխավոր հյուպատոսությունում։ Սյունիքի մարզում քվեարկությունն անցկացվել է ժամկետից շուտ։
Մարտի 15-ից 17-ը Ռուսաստանում ընթանում է նախագահական ընտրությունների քվեարկությունը, այդ թվում՝ հեռավար ձևաչափով։ Պետության ղեկավարի պաշտոնի համար պայքարում են չորս թեկնածուներ՝ Վլադիմիր Պուտինը (որպես ինքնառաջադրված թեկնածու), Վլադիսլավ Դավանկովը (Նոր մարդիկ կուսակցություն), Լեոնիդ Սլուցկին (ЛДПР) և Նիկոլայ Խարիտոնովը (Ռուսաստանի Դաշնության Կոմունիստական կուսակցություն):