ՀՀ–ում դպրոցներ չեն կառուցվել, քանի որ սեյսմիկ նորմեր չեն եղել. Տերտերյան

ԵՐԵՎԱՆ, 15 մարտի – Sputnik. Միջազգային վարկերով դպրոցների կառուցումն ու վերանորոգումը հետաձգվեց, քանի որ ՀՀ–ում սեյսմակայուն շինարարության ժամանակակից նորմեր չկային, իսկ շինհրապարակներում չէր պահպանվում անվտանգության տարրական կանոնները։ Այս մասին ՀՀ ԱԺ ֆինանսավարկային և բյուջետային հարցերի հանձնաժողովի նիստում հայտարարեց ՀՀ տարածքային կառավարման և ենթակառուցվածքների փոխնախարար Վաչե Տերտերյանը։

Ըստ նրա` նախատեսված գրեթե բոլոր դպրոցները, որոնք պետք է վերանորոգվեին, ավելի մանրամասն փորձաքննության արդյունքում որոշվեց նորից կառուցել։

ՀՀ–ում սեյսմակայուն դպրոցների շինարարությունն ու վերանորոգումն իրականացվում է Ասիական զարգացման բանկի վարկով, 2016 թվականից: Ծրագրի ընդհանուր բյուջեն կազմում է 107 մլն դոլար։ Նախագծով նախատեսված է 46 դպրոցի հիմնանորոգում կամ զրոյից կառուցում, սակայն առայժմ աշխատանքներն ավարտվել են միայն 16 դպրոցի դեպքում, կառուցվում է ևս 20–ը: 2023 թ. նոյեմբերին ՀՀ կառավարությունը բանկի հետ լրացուցիչ ֆինանսավորման համաձայնագիր է կնքել արդեն եվրոյով (66,1 մլն), որն էլ այսօր ներկայացվել է ԱԺ վավերացմանը։

Փոխնախարարի խոսքով՝ ՀՀ–ում 2016 թ–ին շինարարության ժամանակակից չափորոշիչները չկային։ Տեղական ընկերությունները, հենվելով իրենց փորձի և գիտելիքների վրա, փորձել են նման նախագծեր կազմել, սակայն դրանք միջազգային փորձաքննություն չեն անցել։

«Հիմա մեր շինարարները արտահագուստով են շրջում, իսկ առաջին անգամ մենք նման պահանջ ենք դրել հենց այս ծրագրի շրջանակում։ Այս տարիների ընթացքում մենք մեծ դժվարությամբ հաղթահարեցինք բիզնեսի մոտ հաստատված պատկերացումներն այն մասին, որ կարելի է, այսպես ասած, «յոլա գնալ» առանց այդ ամենի»,– հայտարարեց Տերտերյանը։

Նա տեղեկացրեց, որ միջազգային փորձագետները, որոնք հրավիրվում էին վարկի շրջանակում, շինհրապարակներից լուսանկարներ էին բերում, որտեղ այդ բոլոր թերություններն արձանագրվում էին:

Լրացուցիչ 66,1 մլն եվրոյի այս համաձայնագրով, ըստ Տերտերյանի, ծրագրով նախատեսված դպրոցների շինարարությունն ու վերանորոգումն ամբողջությամբ կավարտվեն առաջիկա տարում։