ԵՐԵՎԱՆ, 14 մարտի – Sputnik. ՀՀ կրթության, մշակույթի և սպորտի նախարար Ժաննա Անդրեասյանը մեկնաբանեց Երևանի Կոմիտասի անվան պետական կոնսերվատորիայի հարցը բուհերի միավորման ծրագրից առանձնացնելու հնարավորությունը։
Մարտի 13-ին հայտնել էինք, որ Երևանի Կոմիտասի անվան պետական կոնսերվատորիայում ստորագրահավաք է անցկացվում։ Դասախոսական կազմն ու ուսանողությունը դեմ են, որ կոնսերվատորիան ակադեմիական քաղաքի մաս կազմի, տեղափոխվի կամ միավորվի այլ բուհի հետ։
«Բուհերի միավորման և գիտահետազոտական կազմակերպությունների հետ միասին մի հովանոցի տակ գործելու ծրագիրը դա օրենք է, որովհետև «Կրթության զարգացման մինչև 2030 թվականի պետական ծրագիրը» հաստատված է ՀՀ ազգային ժողովի կողմից, որտեղ նշված է մեր թիրախը, թե մենք պետական ֆինանսավորմամբ քանի բուհ պետք է ունենանք։ Դրա շրջանակում քննարկումներ պետք է տեղի ունենան»,–ասաց Անդրեասյանը` կառավարության նիստից հետո պատասխանելով լրագրողների հարցերին։
Նա հիշեցրեց, որ ԿԳՄՍՆ–ն 2023 թվականի հուլիսին հայտարարություն է տարածել և պարզ ներկայացրել, որ առաջիկայում կրթության զարգացման մինչև 2030 թվականի պետական ծրագրով նախատեսված բուհերի խոշորացման և գիտահետազոտական կազմակերպությունների միավորման կոնտեքստում քննարկումներ են սկսում։
ԿԳՄՍՆ–ն դեռ նախորդ տարի առաջարկել է, որ բուհերն ու ինստիտուտները մինչև այս տարվա փետրվարի 15–ն իրենց առաջարկները ներկայացնեն, թե ինչ դիտարկումներ և պատկերացումներ ունեն։
Նախարարը նշեց, որ այժմ ամեն ուղղությամբ ձևավորվել են աշխատանքային խմբեր, որոնք մանրամասն քննարկելու են ինչպես կողմ, այնպես էլ դեմ տեսակետները, հիմնավորումներն ու փաստարկները։
«Արվեստների ուղղությամբ կայացել է աշխատանքային խմբի առաջին քննարկումը։ Կոնսերվատորիայի ներկայացուցիչները ևս ընդգրկված են եղել քննարկմանը։ Սա շատ բարդ և բազմաշերտ գործընթաց է, պարզ է, որ շատ բան պետք է հաշվի առնվի։ Մենք սիրով կլսենք բոլոր կարծիքները։ Ես ուրախ եմ, որ ակտիվ են մեր ուսանողները, պրոֆեսորադասախոսական կազմը։ Միասին շատ խոսելու կարիք ունենք»,–ասաց նախարարը։
Հիշեցնենք` օրերս ԶԼՄ–ներում լուր տարածվեց, թե Երևանի Կոմիտասի անվան պետական կոնսերվատորիան փակվում է։ Ռեկտորը հայտարարեց, որ նման բան չկա, ուղղակի հիմնանորոգում են կիսով չափ։
Ավելի ուշ ԿԳՄՍՆ–ն հայտարարություն տարածեց` նշելով, որ Հայաստանում նախատեսված են բուհական կրթության 6 ուղղություններ՝ արվեստների, կրթական, բժշկական, դասական, տեխնոլոգիական, սպայական, ու ստեղծված են համապատասխան աշխատանքային խմբեր, որոնց հետ կքննարկվեն բուհերից ստացված առաջարկներն ու դիտարկումները՝ բուհերի միավորման-խոշորացման վերաբերյալ։