ԵՐԵՎԱՆ, 13 մարտի – Sputnik. ՀՀ ազգային անվտանգության ծառայությունը չի բողոքարկել ֆրանսահայ կազմակերպությունների համակարգող խորհրդի (CCAF) համանախագահ Մուրադ Փափազյանի պերսոնա նոն գրատա կարգավիճակը վերացնելու` վարչական դատարանի վճիռը, ինչպես և հրահանգել է ՀՀ վարչապետ Նիկոլ Փաշինյանը։ Այս մասին գրում է «Հրապարակ» օրաթերթը
Ավելի վաղ հայտնի էր դարձել, որ Փաշինյանը Փարիզ կատարած այցի ընթացքում Ֆրանսիայի նախագահ Էմանուել Մակրոնի միջնորդությամբ հանդիպել է Մուրադ Փափազյանի հետ, որից հետո վարչապետը հայտնել է, որ ՀՀ իշխանությունները Հայաստան վերադառնալու Փափազյանի իրավունքը վերականգնելու որոշումը չեն բողոքարկելու։
Միաժամանակ «Հրապարակը» գրում է, որ ԱԱԾ-ն բողոքարկել է Սյունե և Մասիս Աբրահամյանների օգտին կայացված վճիռները։ Փափազյանի շահերի ներկայացուցիչ Սիրանուշ Սահակյանը լրատվամիջոցի հետ զրույցում նշել է, որ ԱԱԾ-ն բոլորի գործերով էլ դատարան ոչ մի հիմք չի ներկայացրել, և իրավիճակը միանման է:
Հիշեցնենք, որ 2022 թվականի հուլիսի 13-ին Փափազյանն ընտանիքով Հայաստան էր ժամանել, բայց «Զվարթնոց» օդանավակայանում նրա մուտքն արգելել են երկիր` հայտարարելով, որ նրա անունը ներառված է «անցանկալի» անձանց ցուցակում։
ՀՀ վարչապետ Նիկոլ Փաշինյանի աշխատակազմը այդ առիթով հայտարարություն էր տարածել, որում նշվում է, որ Փափազյանը 2021 թվականի հունիսի 1-ին Ֆրանսիա կատարած այցի ժամանակ վարչապետի պատվիրակության ավտոշարասյան վրա իրականացրած հարձակման կազմակերպիչներից մեկն էր։ Օգոստոսի 1-ին իրավապահ մարմինները արգելեցին Մասիս Աբրահամյանի, ինչպես նաև նրա դստեր՝ ՀՅԴ երիտթևի ներկայացուցիչ Սյունե Աբրահամյանի մուտքը Հայաստան։