ԵՐԵՎԱՆ, 13 մարտի – Sputnik. ՀՀ ԿԳՄՍՆ Բարձրագույն կրթության և գիտության կոմիտեում այսօր տեղի է ունեցել «Ակադեմիական քաղաք» ծրագրով նախատեսված ՀՀ պետական բուհերի խոշորացման և գիտահետազոտական կազմակերպությունների հետ ինտեգրման գործընթացի շրջանակներում ձևավորված Արվեստների աշխատանքային խմբի առաջին նիստը: Տեղեկությունը հրապարակվել է «Ակադեմիական քաղաքի» ֆեյսբուքյան էջում։
Նշվում է, որ հանդիպմանը մասնակցել են Երևանի թատրոնի և կինոյի պետական ինստիտուտի, Երևանի Կոմիտասի անվան պետական կոնսերվատորիայի, Հայաստանի գեղարվեստի պետական ակադեմիայի, ՀՀ ԳԱԱ հնագիտության և ազգագրության ինստիտուտի և ՀՀ ԳԱԱ արվեստի ինստիտուտի ներկայացուցիչները։
«Մասնակիցները քննարկել են ոլորտի զարգացման հեռանկարներին առնչվող հարցեր, ներկայացրել հայեցակարգային առաջարկություններ, ուրվագծել են հետագա համագործակցության ուղղությունները և Արվեստների աշխատանքային խմբի շրջանակներում համատեղ աշխատանքը»,– նշված է հաղորդագրության մեջ:
Sputnik Արմենիայի հետ զրույցում ԵԹԿԻ–ի հանրային կապերի պատասխանատու Վովա Արզումանյանը որոշ մանրամասներ հայտնեց հանդիպումից։
«Այսօրվա հանդիպումը քննարկումների ձևաչափով էր. ամեն ինչ քննարկվել է սխեմատիկ իրավիճակների համար, այսինքն` դեռ կլաստերների կառուցվածքն է հստակեցվում, ոչ մի հստակ բան դեռ չկա։ Այդ իսկ պատճառով մենք` որպես բուհ, չենք կարող դիրքորոշում կամ կարծիք հայտնել, քանի որ այդ հստակությունը դեռ չկա»,– ասաց նա։
Ինչ վերաբերում է օրերս մամուլում հրապարակված բուհերի ցուցակին (որոնց մեջ մտնում են արվեստների ուղղությամբ 6 բուհ և կենտրոն), ըստ որի` իրականացվելու է բուհերի օպտիմալացման և կամ խոշորացման ծրագիրը, Արզումանյանը վստահեցրեց, որ այդ մասին ԶԼՄ–երից են տեղեկացել։
Արդյոք Երևանի Կոմիտասի անվան պետական կոնսերվատորիայի օրինակով ԵԹԿԻ–ում ևս կարո՞ղ են լինել բողոքի ակցիաներ, Արզումայնը նշեց, որ այս պահին բուհում դասերն ընթանում են բնականոն հունով, ոչ մի գործընթաց տեղի չի ունենում։
Նշենք, որ օրերս ԶԼՄ–ներում լուր տարածվեց, թե Երևանի Կոմիտասի անվան պետական կոնսերվատորիան փակվում է։ Ռեկտորը հայտարարեց, որ նման բան չկա, ուղղակի հիմնանորոգում են կիսով չափ։ Կոնսերվատորիայում ստորագրահավաք է սկսվել. դասախոսական կազմն ու ուսանողությունը դեմ են, որ կոնսերվատորիան ակադեմիական քաղաքի մաս կազմի, տեղափոխվի կամ միավորվի այլ բուհի հետ։
Ավելի ուշ ԿԳՄՍՆ–ն հայտարարություն տարածեց` նշելով, որ Հայաստանում նախատեսված են բուհական կրթության 6 ուղղություններ՝ արվեստների, կրթական, բժշկական, դասական, տեխնոլոգիական, սպայական, ու ստեղծված են համապատասխան աշխատանքային խմբեր, որոնց հետ կքննարկվեն բուհերից ստացված առաջարկներն ու դիտարկումները՝ բուհերի միավորման-խոշորացման վերաբերյալ։
Նշենք նաև, որ կառավարության ծրագրերի համաձայն` նախատեսվում է «Ակադեմիական քաղաք» տեղափոխել բուհերն ու գիտական համալսարանները` դրանք հավաքելով մեկ հարթակում։ Նախագիծը ոլորտի բազմաթիվ մասնագետների դժգոհությունն է առաջացրել։