ԵՐԵՎԱՆ, 11 մարտի – Sputnik. Իսրայելը չեզոքացրել է Գազայի հատվածում ՀԱՄԱՍ-ի՝ հիերարխիայում նշանակությամբ չորրորդ առաջնորդին: Այս մասին հայտարարել է Իսրայելի վարչապետ Բենիամին Նեթանյահուն։
«Մենք լիակատար հաղթանակի ճանապարհին ենք։ Այդ հաղթանակի ճանապարհին մենք արդեն վերացրել ենք ՀԱՄԱՍ-ի չորրորդ (նշանակությամբ) անդամին։ Թիվ մեկը, երկուսը և երեքը հերթում են»,-հայտարարել է Նեթանյահուն իր տեսաուղերձում։
Հայտարարությունը հնչել է պաղեստինյան ՀԱՄԱՍ շարժման` նշանակությամբ երրորդ հրամանատար Մարվան Իսայի հնարավոր չեզոքացման մասին հաղորդագրությունների ֆոնին։ Իսան զբաղեցնում էր կազմակերպության ռազմական թևի ղեկավարի տեղակալի պաշտոնը:
«The Times of Israel» թերթը գրում է, որ չորրորդ համարի տակ հավանաբար նկատի ունեն ՀԱՄԱՍ-ի քաղբյուրոյի փոխղեկավար Սալեհ Ալ-Արուրիի սպանությունը, որը տեղի է ունեցել Լիբանանում հունվարի սկզբին:
Հիշեցնենք` 2023 թ. հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։
Մի քանի օրվա ընթացքում իսրայելցի զինվորականները վերահսկողության տակ վերցրին Գազայի սահմանի մոտ գտնվող բոլոր բնակավայրերը և սկսեցին ավիացիոն հարվածներ հասցնել տարածքում գտնվող օբյեկտներին, այդ թվում՝ քաղաքացիական: