ԵՐԵՎԱՆ, 11 մարտի – Sputnik․ ՀՀ վարչապետ Նիկոլ Փաշինյանն այսօր հանդիպել է տեսչական մարմինների հետ և ներկայացրել հայեցակարգային տարբերությունը «հանրությունը կամ սուբյեկտները տուգանքի մատերիալ են, թե ոչ» հայտնի թեմայի շրջանակում։ Վարչապետի մամուլի ծառայությունից հայտնում են, որ կառավարության ղեկավարը խոսել է այն մեխանիզմների մասին, որոնք անհրաժեշտ է գործի դնել, որպեսզի օրենքի, սահմանված նորմի խախտում թույլ տված մարդը չշարունակի նույն սխալ գործունեությունը՝ հարցը լուծելով ընդամենը տուգանք վճարելով։
«Ճանապարհային երթևեկության պարագայում մենք այդ խնդիրը լուծեցինք: Ո՞նց լուծեցինք, որովհետև նորից այս փիլիսոփայությունն էր դրած: Մենք փոխեցինք, ասացինք՝ կգա բալային համակարգ, և եթե դու իքս պահի շարունակում ես խախտելը, կզրկվես վարորդական իրավունքից և հաջորդ անգամ վարորդական իրավունք ստանալու համար նորից քննություն կհանձնես: Նույնիսկ դեպքեր կան, որ գնում է քրեական գործ, քրեական պատասխանատվություն: Այսինքն՝ այստեղ նաև ինչ-որ առումով քաղաքացիների հավասարությունն օրենքի առաջ ապահովելու խնդիր է, որովհետև այնպես չէ, որ եթե մեկը փող ունի, կարող է անընդհատ վճարել և խախտել»,- ասել է Փաշինյանը։
Վարչապետը կարևորել է տեսչական մարմինների վերահսկողական մեխանիզմների արդյունավետության բարձրացումը, շեշտել մարզերում աշխատանքներն առավել ակտիվացնելու խնդիրը։
«Կառավարության նիստերում ես առնվազն մի քանի անգամ խոսել եմ աշխատասենյակից դուրս աշխատելու մասին: Հիմա ես չեմ հասկանում, թե ինչպես կարող է գյուղատնտեսության հետ կապված հարց համակարգել աշխատասենյակից, մեր պաշտոնյաները պետք է իրենց աշխատանքի գոնե կեսը գյուղերում անցկացնեն: Գնում ես, մտնում մի գյուղ, հետո մարդկանց խոսացածից հասկանում ես, որ այդ մարդիկ տարիներով ոչ մի պաշտոնյա չեն տեսել, նույնիսկ՝ վարչության պետի տեղակալի, ավագ կամ կրտսեր մասնագետի»,- ասել է Փաշինյանը։
Անդրադարձ է կատարվել նաև ապօրինի գործող բենզալցակայանների ապամոնտաժման քայլերին: Զեկուցվել է, որ հաշվետու տարվա ընթացքում հանրապետությունում ապամոնտաժվել է 40 ապօրինի գործող բենզալցակայան:
Մթնոլորտային օդի պահպանության ուղղությամբ արձանագրվել է 329 խախտման դեպք, կիրառվել է 26 մլն դրամի չափով վարչական տույժ։ Խախտումներից 132-ը վերաբերում են շինարարության ոլորտին, 64-ը՝ բեռնատար մեքենաներով նյութերի տեղափոխմանը և այլն։