ԵՐԵՎԱՆ, 7 մարտի – Sputnik. ՀՀ կառավարությունը հավանություն տվեց ՀՀ և Ասիական զարգացման բանկի միջև «Հայաստան–Վրաստան սահմանային տարածաշրջանային ճանապարհի (Մ6 Վանաձոր–Բագրատաշեն) բարելավման ծրագիր» վարկի փակման ժամկետի 3–րդ երկարաձգմանը։
ՀՀ և ԱԶԲ միջև համաձայնագիրը ստորագրվել է 2016 թ․ նոյեմբերի 9–ին, նպատակն է հիմնանորոգել Մ6, Վանաձոր–Ալավերդի–Վրաստանի սահման միջպետական նշանակության ավտոճանապարհի՝ Քոբայր-Բագրատաշենի սահմանային անցակետի 51․74 կմ երկարությամբ հատվածը:
«Համաձայնագրի երկարաձգման անհրաժեշտությունն առաջացել է այն բանից հետո, երբ վարկային միջոցների հասանելիության ժամկետը՝ 2023 թ․ դեկտեմբերի 31–ը, չի բավականացրել շինարարական աշխատանքների որակի համար կապալառուների պատասխանատվության ժամանակահատվածի ապահովման, ինչպես նաև նախագծային մի շարք աշխատանքներ ավարտելու համար»,– նշված է որոշման հիմնավորման մեջ:
Նախատեսվում է ծրագրի փակման ժամկետը երկարաձգել մինչև 2024 թ. օգոստոսի 31–ը:
«Վարկի փակման ժամկետի 3–րդ երկարաձգում և վարկային միջոցների վերաբաշխում» նամակ–համաձայնագրի նախագիծը ՀՀ պետական բյուջեի համար առաջացնում է լրացուցիչ ֆինանսական պարտավորություններ 1 մլն 494 հազար եվրոյի չափով։