ԵՐԵՎԱՆ, 5 մարտի – Sputnik. Հայաստանի ամենամեծ աղբավայրում` Նուբարաշենում, հրդեհ է։ Sputnik Արմենիայի տվյալներով` այդ տարածքում հրդեհը բռնկվել է մարտի 3-ին։
Մարտի 4-ի վաղ առավոտից քաղաքապետարանի մասնագիտացված ծառայությունների խմբերը սկսել են հրդեհաշիջման աշխատանքները։
Երևանի քաղաքապետարանի տեղեկատվության և հասարակայնության հետ կապերի վարչությունից հայտնեցին, որ հրդեհի աղբյուրը դեռևս հայտնի չէ: Հաշվի առնելով կուտակված թափոնների ծավալը, դիտարկվում է, որ հրդեհի պատճառը կարող են աղբի տարրալուծման գործընթացում արտանետվող գազերը լինել։ Այրվող հատվածները շարունակում են ծխալ։
ՆԳՆ փրկարար ծառայությունից նշեցին, որ հրդեհի մասին տեղեկատվությունն իրենց մոտ ստացվել է մարտի 4-ին։ Դեպքի վայր 3 մարտական հաշվարկ է մեկնել։
«Այրվել է 3 000 քմ աղբ, հրդեհաշիջման աշխատանքների ժամանակ օգտագործվել է 61 տոննա ջուր։ Հրդեհը մեկուսացվել է մարտի 5-ին` ժամը 00։55-ին»,– ասացին ՓԾ–ից։
Նուբարաշենի քաղաքային աղբավայրը շահագործման է հանձնվել 1950-ականներին։ Այն գտնվում է մայրաքաղաքի կենտրոնից 9-10 կմ հեռավորության վրա, տարածքը կազմում է 52,3 հա։ Քաղաքապետարանի տվյալներով՝ այստեղ օրական միջին հաշվով1000-1200 տոննա (տարեկան 365-440 հազար տոննա) կենցաղային և այլ աղբ է հասնում այնտեղ։
Կենցաղային աղբը չի տեսակավորվում և չի վերամշակվում, այլ խտացվում և չեզոքացվում է՝ ծածկում են հողի շերտով: Միակ «տեսակավորումը», եթե կարելի է այդպես անվանել, իրականացնում են մարդիկ, որոնց համար աղբի մեջ պետքական բան փնտրելը գումար վաստակելու միակ հնարավոր ձևն է։
Այժ քաղաքային իշխանությունը զբաղվում է Նուբարաշենի աղբավայրի փակման նախագծով։ Նախատեսվում է դրա փոխարեն նոր սանիտարական աղբավայր կառուցել։