Վրաստանը, Ադրբեջանը, Հունգարիան և Ռումինիան քննարկել են ստորջրյա մալուխ անցկացնելու հարցը

ԵՐԵՎԱՆ, 1 մարտի – Sputnik. Վրաստանի, Ադրբեջանի, Հունգարիայի և Ռումինիայի իշխանությունները քննարկում են Սև ծովի հատակով էլեկտրական մալուխ անցկացնելու հարցով համատեղ ընկերություն ստեղծելու հնարավորությունը։ Տեղեկությունը հայտնում է Վրաստանի էկոնոմիկայի և կայուն զարգացման նախարարության մամուլի ծառայությունը՝ ամփոփելով նախարարների` Բաքվում կայացած հանդիպումը։ Տեղեկությունը հայտնում է ՏԱՍՍ–ը։

Վրաստանի առաջին փոխվարչապետ, էկոնոմիկայի նախարար Լևան Դավիթաշվիլին, որը գլխավորում էր վրացական պատվիրակությունը Բաքվում, ստորջրյա էլեկտրական մալուխի անցկացումը հավակնոտ նախաձեռնություն է անվանել, որը վճռորոշ դեր կխաղա էներգիայի փոխանցման կայուն շղթայի ապահովման գործում և կնպաստի նախագծի մասնակից երկրների միջև համագործակցությանը: Մամուլի ծառայությունից նշել են, որ Սևծովյան մալուխի նախագիծը կարևոր քայլ է էներգետիկ անվտանգության ձևավորման ճանապարհին:

Հանդիպմանը մասնակցել են նաև էներգետիկայի հարցերով եվրահանձնակատար Քադրի Սիմսոնը և Բուլղարիայի կառավարության ներկայացուցիչը:

Ադրբեջանի, Հունգարիայի, Վրաստանի և Ռումինիայի կառավարությունները 2022 թվականի դեկտեմբերի 17-ին Բուխարեստում ստորագրել են կանաչ էներգիայի զարգացման և մատակարարման ռազմավարական գործընկերության մասին համաձայնագիր, որով նախատեսվում է Սև ծովի հատակով 1 ԳՎտ հզորությամբ էլեկտրաէներգիայի փոխանցման մալուխ անցկացնել։ Անցյալ տարվա հունիսին նախագծին միանալու մտադրության մասին հայտարարել էր Բուլղարիան։ Ենթադրվում է, որ մալուխի անցկացումը կտևի 3-4 տարի։